texts/callimachus.hymns.tess

<call. hymns. 1.1> Ζηνὸς ἔοι τί κεν ἄλλο παρὰ σπονδῆισιν ἀείδειν
<call. hymns. 1.2> λώιον ἢ θεὸν αὐτόν, ἀεὶ μέγαν, αἰὲν ἄνακτα,
<call. hymns. 1.3> Πηλαγόνων ἐλατῆρα, δικασπόλον οὐρανίδηισι;
<call. hymns. 1.4> πῶς καί μιν, Δικταῖον ἀείσομεν ἠὲ Λυκαῖον;
<call. hymns. 1.5> ἐν δοιῆι μάλα θυμός, ἐπεὶ γένος ἀμφήριστον.
<call. hymns. 1.6> Ζεῦ δὲ μὲν ̓Ιδαίοισιν ἐν οὔρεσί φασι γενέσθαι,
<call. hymns. 1.7> Ζεῦ δὲ δ' ἐν ̓Αρκαδίηι: πότεροι, πάτερ, ἐψεύσαντο;
<call. hymns. 1.8> “Κρῆτες ἀεὶ ψεῦσται”: καὶ γὰρ τάφον, ὦ ἄνα, σεῖο
<call. hymns. 1.9> Κρῆτες ἐτεκτήναντο: σὺ δ' οὐ θάνες, ἐσσὶ γὰρ αἰεί.
<call. hymns. 1.10> ἐν δέ σε Παρρασίηι ̔Ρείη τέκεν, ἧχι μάλιστα
<call. hymns. 1.11> ἔσκεν ὄρος θάμνοισι περισκεπές （ἔνθεν ὁ χῶρος
<call. hymns. 1.12> ἱερός, οὐδέ τί μιν κεχρημένον Εἰλειθυίης
<call. hymns. 1.13> ἑρπετὸν οὐδὲ γυνὴ ἐπιμίσγεται, ἀλλά ἑ ̔Ρείης
<call. hymns. 1.14> ὠγύγιον καλέουσι λεχώιον ̓Απιδανῆες）:
<call. hymns. 1.15> ἔνθα ς' ἐπεὶ μήτηρ μεγάλων ἀπεθήκατο κόλπων,
<call. hymns. 1.16> αὐτίκα δίζητο ῥόον ὕδατος ὧι κε τόκοιο
<call. hymns. 1.17> λύματα χυτλώσαιτο τεὸν δ' ἐνὶ χρῶτα λοέσσαι.
<call. hymns. 1.18> Λάδων ἀλλ' οὔπω μέγας ἔρρεεν οὐδ' ̓Ερύμανθος,
<call. hymns. 1.19> λευκότατος ποταμῶν, ἔτι δ' ἄβροχος ἦεν ἅπασα
<call. hymns. 1.20> ̓Αρκαδίη: μέλλεν δὲ μάλ' εὔυδρος καλέεσθαι
<call. hymns. 1.21> αὖτις: ἐπεὶ τημόσδε, ̔Ρέη ὅτ' ἐλύσατο μίτρην,
<call. hymns. 1.22> ἦ πολλὰς ἐφύπερθε σαρωνίδας ὑγρὸς ̓Ιάων
<call. hymns. 1.23> ἤειρεν, πολλὰς δὲ Μέλας ὤκχησεν ἁμάξας,
<call. hymns. 1.24> πολλὰ δὲ Καρίωνος ἄνω διεροῦ περ ἐόντος
<call. hymns. 1.25> ἰλυοὺς ἐβάλοντο κινώπετα, νίσσετο δ' ἀνήρ
<call. hymns. 1.26> πεζὸς ὑπὲρ Κρᾶθίν τε πολύστιόν τε Μετώπην
<call. hymns. 1.27> διψαλέος: τὸ δὲ πολλὸν ὕδωρ ὑπὸ ποσσὶν ἔκειτο.
<call. hymns. 1.28> καί ῥ' ὑπ' ἀμηχανίης σχομένη φάτο πότνια ̔Ρείη
<call. hymns. 1.29> 'Γαῖα φίλη τέκε καὶ σύ: τεαὶ δ' ὠδῖνες ἐλαφραί.'
<call. hymns. 1.30> εἶπε καὶ ἀντανύσασα θεὴ μέγαν ὑψόθι πῆχυν
<call. hymns. 1.31> πλῆξεν ὄρος σκήπτρωι: τὸ δέ οἱ δίχα πουλὺ διέστη,
<call. hymns. 1.32> ἐκ δ' ἔχεεν μέγα χεῦμα: τόθι χρόα φαιδρύνασα
<call. hymns. 1.33> ὦνα τεὸν σπείρωσε, Νέδηι δέ σε δῶκε κομίζειν
<call. hymns. 1.34> κευθμὸν ἔσω Κρηταῖον, ἵνα κρύφα παιδεύοιο,
<call. hymns. 1.35> πρεσβυτάτηι Νυμφέων, αἵ μιν τότε μαιώσαντο
<call. hymns. 1.36> πρωτίστη γενεὴ μετά γε Στύγα τε Φιλύρην τε.
<call. hymns. 1.37> οὐδ' ἁλίην ἀπέτεισε θεὴ χάριν, ἀλλὰ τὸ χεῦμα
<call. hymns. 1.38> κεῖνο Νέδην ὀνόμηνε: τὸ μέν ποθι πουλὺ κατ' αὐτό
<call. hymns. 1.39> Καυκώνων πτολίεθρον, δ Λέπρειον πεφάτισται,
<call. hymns. 1.40> συμφέρεται Νηρῆι, παλαιότατον δέ μιν ὕδωρ
<call. hymns. 1.41> υἱωνοὶ πίνουσι Λυκαονίης ἄρκτοιο.
<call. hymns. 1.42> εὖτε Θενὰς ἀπέλειπεν ἐπὶ Κνωσοῖο φέρουσα
<call. hymns. 1.43> Ζεῦ πάτερ ἡ Νύμφη σε （Θεναὶ δ' ἔσαν ἐγγύθι Κνωσοῦ）,
<call. hymns. 1.44> τουτάκι τοι πέσε δαῖμον ἄπ' ὀμφαλός: ἔνθεν ἐκεῖνο
<call. hymns. 1.45> ὀμφάλιον μετέπειτα πέδον καλέουσι Κύδωνες.
<call. hymns. 1.46> Ζεῦ σὲ δὲ Κυρβάντων ἑτάραι προσεπηχύναντο
<call. hymns. 1.47> Δικταῖαι Μελίαι, δὲ δ' ἐκοίμισεν ̓Αδρήστεια
<call. hymns. 1.48> λίκνωι ἐνὶ χρυσέωι, σὺ δ' ἐθήσαο πίονα μαζόν
<call. hymns. 1.49> αἰγὸς ̓Αμαλθείης, ἐπὶ δὲ γλυκὺ κηρίον ἔβρως.
<call. hymns. 1.50> γέντο γὰρ ἐξαπιναῖα Πανακρίδος ἔργα μελίσσης
<call. hymns. 1.51> ̓Ιδαίοις ἐν ὄρεσσι, τά τε κλείουσι Πάνακρα.
<call. hymns. 1.52> οὖλα δὲ Κούρητές σε περὶ πρύλιν ὠρχήσαντο
<call. hymns. 1.53> τεύχεα πεπλήγοντες, ἵνα Κρόνος οὔασιν ἠχήν
<call. hymns. 1.54> ἀσπίδος εἰσαΐοι καὶ μή σεο κουρίζοντος.
<call. hymns. 1.55> καλὰ μὲν ἠέξευ, καλὰ δ' ἔτραφες οὐράνιε Ζεῦ,
<call. hymns. 1.56> ὀξὺ δ' ἀνήβησας, ταχινοὶ δέ τοι ἦλθον ἴουλοι.
<call. hymns. 1.57> ἀλλ' ἔτι παιδνὸς ἐὼν ἐφράσσαο πάντα τέλεια:
<call. hymns. 1.58> τῶι τοι καὶ γνωτοὶ προτερηγενέες περ ἐόντες
<call. hymns. 1.59> οὐρανὸν οὐκ ἐμέγηραν ἔχειν ἐπιδαίσιον οἶκον.
<call. hymns. 1.60> δηναιοὶ δ' οὐ πάμπαν ἀληθέες ἦσαν ἀοιδοί:
<call. hymns. 1.61> φάντο πάλον Κρονίδηισι διάτριχα δώματα νεῖμαι:
<call. hymns. 1.62> τίς δέ κ' ἐπ' οὐλύμπωι τε καὶ ἄιδι κλῆρον ἐρύσσαι,
<call. hymns. 1.63> δς μάλα μὴ νενίηλος; ἐπ' ἰσαίηι γὰρ ἔοικε
<call. hymns. 1.64> πήλασθαι: τὰ δὲ τόσσον ὅσον διὰ πλεῖστον ἔχουσι.
<call. hymns. 1.65> ψευδοίμην ἀίοντος ἅ κεν πεπίθοιεν ἀκουήν.
<call. hymns. 1.66> οὔ σε θεῶν ἐσσῆνα πάλοι θέσαν, ἔργα δὲ χειρῶν,
<call. hymns. 1.67> σή τε βίη τό τε κάρτος, ὃ καὶ πέλας εἵσαο δίφρου.
<call. hymns. 1.68> θήκαο δ' οἰωνῶν μέγ' ὑπείροχον ἀγγελιώτην
<call. hymns. 1.69> σῶν τεράων: ἅ τ' ἐμοῖσι φίλοις ἐνδέξια φαίνοις.
<call. hymns. 1.70> εἵλεο δ' αἰζηῶν ὅ τι φέρτατον: οὐ σύ γε νηῶν
<call. hymns. 1.71> ἐμπεράμους, οὐκ ἄνδρα σακέσπαλον, οὐ μὲν ἀοιδόν:
<call. hymns. 1.72> ἀλλὰ τὰ μὲν μακάρεσσιν ὀλίζοσιν αὖθι παρῆκας
<call. hymns. 1.73> ἄλλα μέλειν ἑτέροισι, σὺ δ' ἐξέλεο πτολιάρχους
<call. hymns. 1.74> αὐτούς, ὧν ὑπὸ χεῖρα γεωμόρος, ὧν ἴδρις αἰχμῆς,
<call. hymns. 1.75> ὧν ἐρέτης, ὧν πάντα: τί δ' οὐ κρατέοντος ὑπ' ἰσχύν;
<call. hymns. 1.76> αὐτίκα χαλκῆας μὲν ὑδείομεν ̔Ηφαίστοιο,
<call. hymns. 1.77> τευχηστὰς δ' ̓́Αρηος, ἐπακτῆρας δὲ Χιτώνης
<call. hymns. 1.78> ̓Αρτέμιδος, Φοίβου δὲ λύρης εὖ εἰδότας οἴμους:
<call. hymns. 1.79> “ἐκ δὲ Διὸς βασιλῆες”: ἐπὶ χθονὸς οὐδὲν ἀνάκτων
<call. hymns. 1.80> θειότερον: τῶι καί σφε τεὴν ἐκρίναο λάξιν.
<call. hymns. 1.81> δῶκας δὲ πτολίεθρα φυλασσέμεν, ἵζεο δ' αὐτὸς
<call. hymns. 1.82> ἄκρηις' ἐν πολίεσσιν, ἐπόψιος οἵ τε δίκηισι
<call. hymns. 1.83> λαὸν ὑπὸ σκολιῆις' οἵ τ' ἔμπαλιν ἰθύνουσιν:
<call. hymns. 1.84> ἐν δὲ ῥυηφενίην ἔβαλές σφισιν, ἐν δ' ἅλις ὄλβον:
<call. hymns. 1.85> πᾶσι μέν, οὐ μάλα δ' ἶσον. ἔοικε δὲ τεκμήρασθαι
<call. hymns. 1.86> ἡμετέρωι μεδέοντι: περιπρὸ γὰρ εὐρὺ βέβηκεν.
<call. hymns. 1.87> ἑσπέριος κεῖνός γε τελεῖ τά κεν ἦρι νοήσηι:
<call. hymns. 1.88> ἑσπέριος τὰ μέγιστα, τὰ μείονα δ', εὖτε νοήσηι.
<call. hymns. 1.89> οἳ δὲ τὰ μὲν πλειῶνι, τὰ δ' οὐχ ἑνί, τῶν δ' ἀπὸ πάμπαν
<call. hymns. 1.90> αὐτὸς ἄνην ἐκόλουσας, ἐνέκλασσας δὲ μενοινήν.
<call. hymns. 1.91> χαῖρε μέγα Κρονίδη πανυπέρτατε, δῶτορ ἐάων,
<call. hymns. 1.92> δῶτορ ἀπημονίης. τεὰ δ' ἔργματα τίς κεν ἀείδοι;
<call. hymns. 1.93> οὐ γένετ', οὐκ ἔσται: τίς καὶ Διὸς ἔργματ' ἀείσει;
<call. hymns. 1.94> χαῖρε πάτερ, χαῖρ' αὖθι: δίδου δ' ἀρετήν τ' ἄφενός τε.
<call. hymns. 1.95> οὔτ' ἀρετῆς ἄτερ ὄλβος ἐπίσταται ἄνδρας ἀέξειν
<call. hymns. 1.96> οὔτ' ἀρετὴ ἀφένοιο: δίδου δ' ἀρετήν τε καὶ ὄλβον.
<call. hymns. 2.1> οἷον ὁ τὠπόλλωνος ἐσείσατο δάφνινος ὅρπηξ,
<call. hymns. 2.2> οἷα δ' ὅλον τὸ μέλαθρον: ἑκὰς ἑκὰς ὅστις ἀλιτρός.
<call. hymns. 2.3> καὶ δή που τὰ θύρετρα καλῶι ποδὶ Φοῖβος ἀράσσει:
<call. hymns. 2.4> οὐχ ὁράαις; ἐπένευσεν ὁ Δήλιος ἡδύ τι φοῖνιξ
<call. hymns. 2.5> ἐξαπίνης, ὁ δὲ κύκνος ἐν ἠέρι καλὸν ἀείδει.
<call. hymns. 2.6> αὐτοὶ νῦν κατοχῆες ἀνακλίνεσθε πυλάων,
<call. hymns. 2.7> αὐταὶ δὲ κληῖδες: ὁ γὰρ θεὸς οὐκ ἔτι μακρήν.
<call. hymns. 2.8> οἱ δὲ νέοι μολπήν τε καὶ ἐς χορὸν ἐντύνεσθε.
<call. hymns. 2.9> ὡπόλλων οὐ παντὶ φαείνεται, ἀλλ' ὅ τις ἐσθλός:
<call. hymns. 2.10> ὅς μιν ἴδηι, μέγας οὗτος, ὃς οὐκ ἴδε, λιτὸς ἐκεῖνος.
<call. hymns. 2.11> ὀψόμεθ', ὦ ̔Εκάεργε, καὶ ἐσσόμεθ' οὔποτε λιτοί.
<call. hymns. 2.12> μήτε σιωπηλὴν κίθαριν μήτ' ἄψοφον ἴχνος
<call. hymns. 2.13> τοῦ Φοίβου τοὺς παῖδας ἔχειν ἐπιδημήσαντος,
<call. hymns. 2.14> εἰ τελέειν μέλλουσι γάμον πολιήν τε κερεῖσθαι,
<call. hymns. 2.15> ἑστήξειν δὲ τὸ τεῖχος ἐπ' ἀρχαίοισι θεμέθλοις.
<call. hymns. 2.16> ἠγασάμην τοὺς παῖδας, ἐπεὶ χέλυς οὐκέτ' ἀεργός.
<call. hymns. 2.17> εὐφημεῖτ' ἀίοντες ἐπ' ̓Απόλλωνος ἀοιδῆι.
<call. hymns. 2.18> εὐφημεῖ καὶ πόντος, ὅτε κλείουσιν ἀοιδοί
<call. hymns. 2.19> ἢ κίθαριν ἢ τόξα, Λυκωρέος ἔντεα Φοίβου.
<call. hymns. 2.20> οὐδὲ Θέτις ̓Αχιλῆα κινύρεται αἴλινα μήτηρ,
<call. hymns. 2.21> ὁππόθ' ἱὴ παιῆον ἱὴ παιῆον ἀκούσηι.
<call. hymns. 2.22> καὶ μὲν ὁ δακρυόεις ἀναβάλλεται ἄλγεα πέτρος,
<call. hymns. 2.23> ὅστις ἐνὶ Φρυγίηι διερὸς λίθος ἐστήρικται,
<call. hymns. 2.24> μάρμαρον ἀντὶ γυναικὸς ὀιζυρόν τι χανούσης.
<call. hymns. 2.25> ἱὴ ἱὴ φθέγγεσθε: κακὸν μακάρεσσιν ἐρίζειν.
<call. hymns. 2.26> ὃς μάχεται μακάρεσσιν, ἐμῶι βασιλῆι μάχοιτο:
<call. hymns. 2.27> ὅστις ἐμῶι βασιλῆι, καὶ ̓Απόλλωνι μάχοιτο.
<call. hymns. 2.28> τὸν χορὸν ὡπόλλων, ὅ τι οἱ κατὰ θυμὸν ἀείδει,
<call. hymns. 2.29> τιμήσει: δύναται γάρ, ἐπεὶ Διὶ δεξιὸς ἧσται.
<call. hymns. 2.30> οὐδ' ὁ χορὸς τὸν Φοῖβον ἐφ' ἓν μόνον ἦμαρ ἀείσει,
<call. hymns. 2.31> ἔστι γὰρ εὔυμνος: τίς ἂν οὐ ῥέα Φοῖβον ἀείδοι;
<call. hymns. 2.32> χρύσεα τὠπόλλωνι τό τ' ἐνδυτὸν ἥ τ' ἐπιπορπίς
<call. hymns. 2.33> ἥ τε λύρη τό τ' ἄεμμα τὸ Λύκτιον ἥ τε φαρέτρη,
<call. hymns. 2.34> χρύσεα καὶ τὰ πέδιλα: πολύχρυσος γὰρ ̓Απόλλων.
<call. hymns. 2.35> καὶ δὲ πολυκτέανος: Πυθῶνί κε τεκμήραιο.
<call. hymns. 2.36> καὶ μὲν ἀεὶ καλὸς καὶ ἀεὶ νέος: οὔποτε Φοίβου
<call. hymns. 2.37> θηλείηις' οὐδ' ὅσσον ἐπὶ χνόος ἦλθε παρειαῖς.
<call. hymns. 2.38> αἱ δὲ κόμαι θυόεντα πέδωι λείβουσιν ἔλαια.
<call. hymns. 2.39> οὐ λίπος ̓Απόλλωνος ἀποστάζουσιν ἔθειραι,
<call. hymns. 2.40> ἀλλ' αὐτὴν πανάκειαν: ἐν ἄστεϊ δ' ὦι κεν ἐκεῖναι
<call. hymns. 2.41> πρῶκες ἔραζε πέσωσιν ἀκήρια πάντ' ἐγένοντο.
<call. hymns. 2.42> τέχνηι δ' ἀμφιλαφὴς οὔ τις τόσον ὅσσον ̓Απόλλων:
<call. hymns. 2.43> κεῖνος ὀιστευτὴν ἔλαχ' ἀνέρα, κεῖνος ἀοιδόν
<call. hymns. 2.44> （Φοίβωι γὰρ καὶ τόξον ἐπιτρέπεται καὶ ἀοιδή）,
<call. hymns. 2.45> κείνου δὲ θριαὶ καὶ μάντιες: ἐκ δέ νυ Φοίβου
<call. hymns. 2.46> ἰητροὶ δεδάασιν ἀνάβλησιν θανάτοιο.
<call. hymns. 2.47> Φοῖβον καὶ Νόμιον κικλήσκομεν ἐξέτι κείνου,
<call. hymns. 2.48> ἐξότ' ἐπ' ̓Αμφρυσσῶι ζευγίτιδας ἔτρεφεν ἵππους
<call. hymns. 2.49> ἠιθέου ὑπ' ἔρωτι κεκαυμένος ̓Αδμήτοιο.
<call. hymns. 2.50> ῥεῖά κε βουβόσιον τελέθοι πλέον, οὐδέ κεν αἶγες
<call. hymns. 2.51> δεύοιντο βρεφέων ἐπιμηλάδες ἧισιν ̓Απόλλων
<call. hymns. 2.52> βοσκομένηις' ὀφθαλμὸν ἐπήγαγεν: οὐδ' ἀγάλακτες
<call. hymns. 2.53> οἴιες οὐδ' ἄκυθοι, πᾶσαι δέ κεν εἶεν ὕπαρνοι,
<call. hymns. 2.54> ἡ δέ κε μουνοτόκος διδυμητόκος αἶψα γένοιτο.
<call. hymns. 2.55> Φοίβωι δ' ἑσπόμενοι πόλιας διεμετρήσαντο
<call. hymns. 2.56> ἄνθρωποι: Φοῖβος γὰρ ἀεὶ πολίεσσι φιληδεῖ
<call. hymns. 2.57> κτιζομένηις', αὐτὸς δὲ θεμείλια Φοῖβος ὑφαίνει.
<call. hymns. 2.58> τετραέτης τὰ πρῶτα θεμείλια Φοῖβος ἔπηξε
<call. hymns. 2.59> καλῆι ἐν ̓Ορτυγίηι περιηγέος ἐγγύθι λίμνης.
<call. hymns. 2.60> ̓́Αρτεμις ἀγρώσσουσα καρήατα συνεχὲς αἰγῶν
<call. hymns. 2.61> Κυνθιάδων φορέεσκεν, ὃ δ' ἔπλεκε βωμὸν ̓Απόλλων.
<call. hymns. 2.62> δείματο μὲν κεράεσσιν ἐδέθλια, πῆξε δὲ βωμὸν
<call. hymns. 2.63> ἐκ κεράων, κεραοὺς δὲ πέριξ ὑπεβάλλετο τοίχους.
<call. hymns. 2.64> ὧδ' ἔμαθεν τὰ πρῶτα θεμείλια Φοῖβος ἐγείρειν.
<call. hymns. 2.65> Φοῖβος καὶ βαθύγειον ἐμὴν πόλιν ἔφρασε Βάττωι
<call. hymns. 2.66> καὶ Λιβύην ἐσιόντι κόραξ ἡγήσατο λαῶι
<call. hymns. 2.67> δεξιὸς οἰκιστῆρι καὶ ὤμοσε τείχεα δώσειν
<call. hymns. 2.68> ἡμετέροις βασιλεῦσιν: ἀεὶ δ' εὔορκος ̓Απόλλων.
<call. hymns. 2.69> ὤπολλον, πολλοί σε Βοηδρόμιον καλέουσι,
<call. hymns. 2.70> πολλοὶ δὲ Κλάριον, πάντη δέ τοι οὔνομα πουλύ:
<call. hymns. 2.71> αὐτὰρ ἐγὼ Καρνεῖον: ἐμοὶ πατρώιον οὕτω.
<call. hymns. 2.72> Σπάρτη τοι Καρνεῖε τὸ δὴ πρώτιστον ἔδεθλον,
<call. hymns. 2.73> δεύτερον αὖ Θήρη, τρίτατόν γε μὲν ἄστυ Κυρήνης.
<call. hymns. 2.74> ἐκ μέν σε Σπάρτης ἕκτον γένος Οἰδιπόδαο
<call. hymns. 2.75> ἤγαγε Θηραίην ἐς ἀπόκτισιν: ἐκ δέ σε Θήρης
<call. hymns. 2.76> οὖλος ̓Αριστοτέλης ̓Ασβυστίδι πάρθετο γαίηι,
<call. hymns. 2.77> δεῖμε δέ τοι μάλα καλὸν ἀνάκτορον, ἐν δὲ πόληι
<call. hymns. 2.78> θῆκε τελεσφορίην ἐπετήσιον, ἧι ἐνὶ πολλοί
<call. hymns. 2.79> ὑστάτιον πίπτουσιν ἐπ' ἰσχίον, ὦ ἄνα, ταῦροι.
<call. hymns. 2.80> ἱὴ ἱὴ Καρνεῖε πολύλλιτε, σεῖο δὲ βωμοί
<call. hymns. 2.81> ἄνθεα μὲν φορέουσιν ἐν εἴαρι τόσσα περ ̔͂Ωραι
<call. hymns. 2.82> ποικίλ' ἀγινεῦσι ζεφύρου πνείοντος ἐέρσην,
<call. hymns. 2.83> χείματι δὲ κρόκον ἡδύν: ἀεὶ δέ τοι ἀέναον πῦρ,
<call. hymns. 2.84> οὐδέ ποτε χθιζὸν περιβόσκεται ἄνθρακα τέφρη.
<call. hymns. 2.85> ἦ ῥ' ἐχάρη μέγα Φοῖβος, ὅτε ζωστῆρες ̓Ενυοῦς
<call. hymns. 2.86> ἀνέρες ὠρχήσαντο μετὰ ξανθῆισι Λιβύσσαις,
<call. hymns. 2.87> τέθμιαι εὖτέ σφιν Καρνειάδες ἤλυθον ὧραι.
<call. hymns. 2.88> οἳ δ' οὔπω πηγῆισι Κύρης ἐδύναντο πελάσσαι
<call. hymns. 2.89> Δωριέες, πυκινῆν δὲ νάπαις ̓́Αζιλιν ἔναιον.
<call. hymns. 2.90> τοὺς μὲν ἄναξ ἴδεν αὐτός, ἑῆι δ' ἐπεδείξατο νύμφηι
<call. hymns. 2.91> στὰς ἐπὶ Μυρτούσσης κερατώδεος, ἧχι λέοντα
<call. hymns. 2.92> ̔Υψηὶς κατέπεφνε βοῶν σίνιν Εὐρυπύλοιο.
<call. hymns. 2.93> οὐ κείνου χορὸν εἶδε θεώτερον ἄλλον ̓Απόλλων,
<call. hymns. 2.94> οὐδὲ πόλει τός' ἔνειμεν ὀφέλσιμα, τόσσα Κυρήνηι,
<call. hymns. 2.95> μνωόμενος προτέρης ἁρπακτύος. οὐδὲ μὲν αὐτοί
<call. hymns. 2.96> Βαττιάδαι Φοίβοιο πλέον θεὸν ἄλλον ἔτεισαν.
<call. hymns. 2.97> ἱὴ ἱὴ παιῆον ἀκούομεν, οὕνεκα τοῦτο
<call. hymns. 2.98> Δελφός τοι πρώτιστον ἐφύμνιον εὕρετο λαός,
<call. hymns. 2.99> ἦμος ἑκηβολίην χρυσέων ἐπεδείκνυσο τόξων.
<call. hymns. 2.100> Πυθώ τοι κατιόντι συνήντετο δαιμόνιος θήρ,
<call. hymns. 2.101> αἰνὸς ὄφις. τὸν μὲν σὺ κατήναρες ἄλλον ἐπ' ἄλλωι
<call. hymns. 2.102> βάλλων ὠκὺν ὀιστόν, ἐπηύτησε δὲ λαός,
<call. hymns. 2.103> 'ἱὴ ἱὴ παιῆον, ἵει βέλος, εὐθύ σε μήτηρ
<call. hymns. 2.104> γείνατ' ἀοσσητῆρα': τὸ δ' ἐξέτι κεῖθεν ἀείδηι.
<call. hymns. 2.105> ὁ Φθόνος ̓Απόλλωνος ἐπ' οὔατα λάθριος εἶπεν
<call. hymns. 2.106> 'οὐκ ἄγαμαι τὸν ἀοιδὸν ὃς οὐδ' ὅσα πόντος ἀείδει'.
<call. hymns. 2.107> τὸν Φθόνον ὡπόλλων ποδί τ' ἤλασεν ὧδέ τ' ἔειπεν:
<call. hymns. 2.108> '̓Ασσυρίου ποταμοῖο μέγας ῥόος, ἀλλὰ τὰ πολλά
<call. hymns. 2.109> λύματα γῆς καὶ πολλὸν ἐφ' ὕδατι συρφετὸν ἕλκει.
<call. hymns. 2.110> Δηοῖ δ' οὐκ ἀπὸ παντὸς ὕδωρ φορέουσι μέλισσαι,
<call. hymns. 2.111> ἀλλ' ἥτις καθαρή τε καὶ ἀχράαντος ἀνέρπει
<call. hymns. 2.112> πίδακος ἐξ ἱερῆς ὀλίγη λιβὰς ἄκρον ἄωτον'.
<call. hymns. 2.113> χαῖρς ἄναξ: ὁ δὲ Μῶμος, ἵν' ὁ Φθόνος, ἔνθα νέοιτο.
<call. hymns. 3.1> ̓́Αρτεμιν （οὐ γὰρ ἐλαφρὸν ἀειδόντεσσι λαθέσθαι）
<call. hymns. 3.2> ὑμνέομεν, τῆι τόξα λαγωβολίαι τε μέλονται
<call. hymns. 3.3> καὶ χορὸς ἀμφιλαφὴς καὶ ἐν οὔρεσιν ἑψιάασθαι,
<call. hymns. 3.4> ἄρχμενοι, ὡς ὅτε πατρὸς ἐφεζομένη γονάτεσσι
<call. hymns. 3.5> παῖς ἔτι κουρίζουσα τάδε προσέειπε γονῆα
<call. hymns. 3.6> 'δός μοι παρθενίην αἰώνιον ἄππα φυλάσσειν,
<call. hymns. 3.7> καὶ πολυωνυμίην, ἵνα μή μοι Φοῖβος ἐρίζηι.
<call. hymns. 3.8> δὸς δ' ἰοὺς καὶ τόξα — ἔα πάτερ, οὔ σε φαρέτρην
<call. hymns. 3.9> οὐδ' αἰτέω μέγα τόξον: ἐμοὶ Κύκλωπες ὀιστοὺς
<call. hymns. 3.10> αὐτίκα τεχνήσονται, ἐμοὶ δ' εὐκαμπὲς ἄεμμα:
<call. hymns. 3.11> ἀλλὰ φαεσφορίην τε καὶ ἐς γόνυ μέχρι χιτῶνα
<call. hymns. 3.12> ζώννυσθαι λεγνωτόν, ἵν' ἄγρια θηρία καίνω.
<call. hymns. 3.13> δὸς δέ μοι ἑξήκοντα χορίτιδας ̓Ωκεανίνας,
<call. hymns. 3.14> πάσας εἰνέτεας, πάσας ἔτι παῖδας ἀμίτρους.
<call. hymns. 3.15> δὸς δέ μοι ἀμφιπόλους ̓Αμνισίδας εἴκοσι νύμφας,
<call. hymns. 3.16> αἵ τέ μοι ἐνδρομίδας τε καί, ὁππότε μηκέτι λύγκας
<call. hymns. 3.17> μήτ' ἐλάφους βάλλοιμι, θοοὺς κύνας εὖ κομέοιεν,
<call. hymns. 3.18> δὸς δέ μοι οὔρεα πάντα: πόλιν δέ μοι ἥντινα νεῖμον
<call. hymns. 3.19> ἥντινα λῆις: σπαρνὸν γὰρ ὅτ' ̓́Αρτεμις ἄστυ κάτεισιν:
<call. hymns. 3.20> οὔρεσιν οἰκήσω, πόλεσιν δ' ἐπιμείξομαι ἀνδρῶν
<call. hymns. 3.21> μοῦνον ὅτ' ὀξείηισιν ὑπ' ὠδίνεσσι γυναῖκες
<call. hymns. 3.22> τειρόμεναι καλέουσι βοηθόον, ἧισί με Μοῖραι
<call. hymns. 3.23> γεινομένην τὸ πρῶτον ἐπεκλήρωσαν ἀρήγειν,
<call. hymns. 3.24> ὅττι με καὶ τίκτουσα καὶ οὐκ ἤλγησε φέρουσα
<call. hymns. 3.25> μήτηρ, ἀλλ' ἀμογητὶ φίλων ἀπεθήκατο γυίων'.
<call. hymns. 3.26> ὣς ἡ παῖς εἰποῦσα γενειάδος ἤθελε πατρὸς
<call. hymns. 3.27> ἅψασθαι, πολλὰς δὲ μάτην ἐτανύσσατο χεῖρας,
<call. hymns. 3.28> μέχρις ἵνα ψαύσειε. πατὴρ δ' ἐπένευσε γελάσσας,
<call. hymns. 3.29> φῆ δὲ καταρρέζων 'ὅτε μοι τοιαῦτα θέαιναι
<call. hymns. 3.30> τίκτοιεν, τυτθόν κεν ἐγὼ ζηλήμονος ̔́Ηρης
<call. hymns. 3.31> χωομένης ἀλέγοιμι. φέρευ τέκος ὅσς' ἐθελημός
<call. hymns. 3.32> αἰτίζεις, καὶ δ' ἄλλα πατὴρ ἔτι μείζονα δώσει.
<call. hymns. 3.33> τρὶς δέκα τοι πτολίεθρα καὶ οὐχ ἕνα πύργον ὀπάσσω,
<call. hymns. 3.34> τρὶς δέκα τοι πτολίεθρα, τὰ μὴ θεὸν ἄλλον ἀέξειν
<call. hymns. 3.35> εἴσεται ἀλλὰ μόνην σὲ καὶ ̓Αρτέμιδος καλέεσθαι:
<call. hymns. 3.36> πολλὰς δὲ ξυνῆι πόλιας διαμετρήσασθαι
<call. hymns. 3.37> μεσσόγεως νήσους τε: καὶ ἐν πάσηισιν ἔσονται
<call. hymns. 3.38> ̓Αρτέμιδος βωμοί τε καὶ ἄλσεα. καὶ μὲν ἀγυιαῖς
<call. hymns. 3.39> ἔσσηι καὶ λιμένεσσιν ἐπίσκοπος'. ὣς ὃ μὲν εἰπὼν
<call. hymns. 3.40> μῦθον ἐπεκρήηνε καρήατι. βαῖνε δὲ κούρη
<call. hymns. 3.41> λευκὸν ἐπὶ Κρηταῖον ὄρος κεκομημένον ὕληι:
<call. hymns. 3.42> ἔνθεν ἐπ' ̓Ωκεανόν: πολέας δ' ἐπελέξατο νύμφας,
<call. hymns. 3.43> πάσας εἰνέτεας, πάσας ἔτι παῖδας ἀμίτρους.
<call. hymns. 3.44> χαῖρε δὲ Καίρατος ποταμὸς μέγα, χαῖρε δὲ Τηθύς,
<call. hymns. 3.45> οὕνεκα θυγατέρας Λητωίδι πέμπον ἀμορβούς.
<call. hymns. 3.46> αὖθι δὲ Κύκλωπας μετεκίαθε: τοὺς μὲν ἔτετμε
<call. hymns. 3.47> νήσωι ἐνὶ Λιπάρηι （Λιπάρη νέον, ἀλλὰ τότ' ἔσκεν
<call. hymns. 3.48> οὔνομά οἱ Μελιγουνίς） ἐπ' ἄκμοσιν ̔Ηφαίστοιο
<call. hymns. 3.49> ἑσταότας περὶ μύδρον: ἐπείγετο γὰρ μέγα ἔργον:
<call. hymns. 3.50> ἱππείην τετύκοντο Ποσειδάωνι ποτίστρην.
<call. hymns. 3.51> αἱ νύμφαι δ' ἔδδεισαν, ὅπως ἴδον αἰνὰ πέλωρα
<call. hymns. 3.52> πρηόσιν †ὀσσείοισιν ἐοικότα, πᾶσι δ' ὑπ' ὀφρύν
<call. hymns. 3.53> φάεα μουνόγληνα σάκει ἴσα τετραβοείωι
<call. hymns. 3.54> δεινὸν ὑπογλαύσσοντα, καὶ ὁππότε δοῦπον ἄκουσαν
<call. hymns. 3.55> ἄκμονος ἠχήσαντος ἐπὶ μέγα πουλύ τ' ἄημα
<call. hymns. 3.56> φυσάων αὐτῶν τε βαρὺν στόνον: αὖε γὰρ Αἴτνη,
<call. hymns. 3.57> αὖε δὲ Τρινακίη, Σικανῶν ἕδος, αὖε δὲ γείτων
<call. hymns. 3.58> ̓Ιταλίη, μεγάλην δὲ βοὴν ἐπὶ Κύρνος ἀύτει,
<call. hymns. 3.59> εὖθ' οἵ γε ρῥαιστῆρας ἀειράμενοι ὑπὲρ ὤμων
<call. hymns. 3.60> ἢ χαλκὸν ζείοντα καμινόθεν ἠὲ σίδηρον
<call. hymns. 3.61> ἀμβολαδὶς τετυπόντες ἐπὶ μέγα μοχθήσειαν.
<call. hymns. 3.62> τῶι σφέας οὐκ ἐτάλασσαν ἀκηδέες ̓Ωκεανῖναι
<call. hymns. 3.63> οὔτ' ἄντην ἰδέειν οὔτε κτύπον οὔασι δέχθαι.
<call. hymns. 3.64> οὐ νέμεσις: κείνους γε καὶ αἱ μάλα μηκέτι τυτθαί
<call. hymns. 3.65> οὐδέποτ' ἀφρικτὶ μακάρων ὁρόωσι θύγατρες.
<call. hymns. 3.66> ἀλλ' ὅτε κουράων τις ἀπειθέα μητέρι τεύχοι,
<call. hymns. 3.67> μήτηρ μὲν Κύκλωπας ἑῆι ἐπὶ παιδὶ καλιστρεῖ,
<call. hymns. 3.68> ̓́Αργην ἢ Στερόπην: ὃ δὲ δώματος ἐκ μυχάτοιο
<call. hymns. 3.69> ἔρχεται ̔Ερμείης σποδιῆι κεχριμένος αἰθῆι:
<call. hymns. 3.70> αὐτίκα τὴν κούρην μορμύσσεται, ἣ δὲ τεκούσης
<call. hymns. 3.71> δύνει ἔσω κόλπους θεμένη ἐπὶ φάεσι χεῖρας.
<call. hymns. 3.72> κοῦρα σὺ δὲ προτέρω περ, ἔτι τριέτηρος ἐοῦσα,
<call. hymns. 3.73> εὖτ' ἔμολεν Λητώ σε μετ' ἀγκαλίδεσσι φέρουσα,
<call. hymns. 3.74> ̔Ηφαίστου καλέοντος ὅπως ὀπτήρια δοίη,
<call. hymns. 3.75> Βρόντεώ σε στιβαροῖσιν ἐφεσσαμένου γονάτεσσι,
<call. hymns. 3.76> στήθεος ἐκ μεγάλου λασίης ἐδράξαο χαίτης,
<call. hymns. 3.77> ὤλοψας δὲ βίηιφι: τὸ δ' ἄτριχον εἰσέτι καὶ νῦν
<call. hymns. 3.78> μεσσάτιον στέρνοιο μένει μέρος, ὡς ὅτε κόρσηι
<call. hymns. 3.79> φωτὸς ἐνιδρυθεῖσα κόμην ἐπενείματ' ἀλώπηξ.
<call. hymns. 3.80> τῶι μάλα θαρσαλέη σφε τάδε προσελέξαο τῆμος
<call. hymns. 3.81> 'Κύκλωπες κἠμοί τι Κυδώνιον εἰ δ' ἄγε τόξον
<call. hymns. 3.82> ἠδ' ἰοὺς κοίλην τε κατακληῖδα βελέμνων
<call. hymns. 3.83> τεύξατε: καὶ γὰρ ἐγὼ Λητωιὰς ὥσπερ ̓Απόλλων.
<call. hymns. 3.84> αἰ δέ κ' ἐγὼ τόξοις μονιὸν δάκος ἤ τι πέλωρον
<call. hymns. 3.85> θηρίον ἀγρεύσω, τὸ δέ κεν Κύκλωπες ἔδοιεν'.
<call. hymns. 3.86> ἔννεπες: οἳ δ' ἐτέλεσσαν: ἄφαρ δ' ὡπλίσσαο δαῖμον.
<call. hymns. 3.87> αἶψα δ' ἐπὶ σκύλακας πάλιν ἤιες: ἵκεο δ' αὖλιν
<call. hymns. 3.88> ̓Αρκαδικὴν ἔπι Πανός. ὃ δὲ κρέα λυγκὸς ἔταμνε
<call. hymns. 3.89> Μαιναλίης, ἵνα οἱ τοκάδες κύνες εἶδαρ ἔδοιεν.
<call. hymns. 3.90> τὶν δ' ὁ γενειήτης δύο μὲν κύνας ἥμισυ πηγούς
<call. hymns. 3.91> τρεῖς δὲ παρουαίους ἕνα δ' αἰόλον, οἵ ῥα λέοντας
<call. hymns. 3.92> αὐτοὺς αὖ ἐρύοντας, ὅτε δράξαιντο δεράων,
<call. hymns. 3.93> εἷλκον ἔτι ζώοντας ἐπ' αὐλίον, ἑπτὰ δ' ἔδωκε
<call. hymns. 3.94> θάσσονας αὐράων Κυνοσουρίδας, αἵ ῥα διῶξαι
<call. hymns. 3.95> ὤκισται νεβρούς τε καὶ οὐ μύοντα λαγωόν,
<call. hymns. 3.96> καὶ κοίτην ἐλάφοιο καὶ ὕστριχος ἔνθα καλιαί
<call. hymns. 3.97> σημῆναι, καὶ ζορκὸς ἐπ' ἴχνιον ἡγήσασθαι.
<call. hymns. 3.98> ἔνθεν ἀπερχομένη （μετὰ καὶ κύνες ἐσσεύοντο）
<call. hymns. 3.99> εὗρες ἐπὶ προμολῆις' ὄρεος τοῦ Παρρασίοιο
<call. hymns. 3.100> σκαιρούσας ἐλάφους, μέγα τι χρέος: αἳ μὲν ἐπ' ὄχθηις
<call. hymns. 3.101> αἰὲν ἐβουκολέοντο μελαμψήφιδος ἀναύρου,
<call. hymns. 3.102> μάσσονες ἢ ταῦροι, κεράων δ' ἀπελάμπετο χρυσός:
<call. hymns. 3.103> ἐξαπίνης δ' ἔταφές τε καὶ ὃν ποτὶ θυμὸν ἔειπες
<call. hymns. 3.104> 'τοῦτό κεν ̓Αρτέμιδος πρωτάγριον ἄξιον εἴη'.
<call. hymns. 3.105> πέντ' ἔσαν αἱ πᾶσαι: πίσυρας δ' ἕλες ὦκα θέουσα
<call. hymns. 3.106> νόσφι κυνοδρομίης, ἵνα τοι θοὸν ἅρμα φέρωσι.
<call. hymns. 3.107> τὴν δὲ μίαν Κελάδοντος ὑπὲρ ποταμοῖο φυγοῦσαν
<call. hymns. 3.108> ̔́Ηρης ἐννεσίηισιν, ἀέθλιον ̔Ηρακλῆι
<call. hymns. 3.109> ὕστερον ὅφρα γένοιτο, πάγος Κερύνειος ἔδεκτο.
<call. hymns. 3.110> ̓́Αρτεμι Παρθενίη Τιτυοκτόνε, χρύσεα μέν τοι
<call. hymns. 3.111> ἔντεα καὶ ζώνη, χρύσεον δ' ἐζεύξαο δίφρον,
<call. hymns. 3.112> ἐν δ' ἐβάλευ χρύσεια θεὴ κεμάδεσσι χαλινά.
<call. hymns. 3.113> ποῦ δέ σε τὸ πρῶτον κερόεις ὄχος ἤρξατ' ἀείρειν;
<call. hymns. 3.114> Αἵμωι ἐπὶ Θρήικι, τόθεν βορέαο κατᾶιξ
<call. hymns. 3.115> ἔρχεται ἀχλαίνοισι δυσαέα κρυμὸν ἄγουσα.
<call. hymns. 3.116> ποῦ δ' ἔταμες πεύκην, ἀπὸ δὲ φλογὸς ἥψαο ποίης;
<call. hymns. 3.117> Μυσῶι ἐν Οὐλύμπωι, φάεος δ' ἐνέηκας ἀυτμήν
<call. hymns. 3.118> ἀσβέστου, τό ῥα πατρὸς ἀποστάζουσι κεραυνοί.
<call. hymns. 3.119> ποσσάκι δ' ἀργυρέοιο θεὴ πειρήσαο τόξου;
<call. hymns. 3.120> πρῶτον ἐπὶ πτελέην, τὸ δὲ δεύτερον ἧκας ἐπὶ δρῦν,
<call. hymns. 3.121> τὸ τρίτον αὖτ' ἐπὶ θῆρα. τὸ τέτρατον οὐκέτ' ἐπὶ δρῦν,
<call. hymns. 3.123> ἀλλά μιν εἰς ἀδίκων ἔβαλες πόλιν, οἵ τε περὶ σφέας
<call. hymns. 3.124> οἵ τε περὶ ξείνους ἀλιτήμονα πολλὰ τέλεσκον,
<call. hymns. 3.125> σχέτλιοι: οἷς τύνη χαλεπὴν ἐμμάξεαι ὀργήν:
<call. hymns. 3.125> κτήνεά φιν λοιμὸς καταβόσκεται, ἔργα δὲ πάχνη,
<call. hymns. 3.126> κείρονται δὲ γέροντες ἐφ' υἱάσιν, αἱ δὲ γυναῖκες
<call. hymns. 3.127> ἢ βληταὶ θνήισκουσι λεχωίδες ἠὲ φυγοῦσαι
<call. hymns. 3.128> τίκτουσιν τῶν οὐδὲν ἐπὶ σφυρὸν ὀρθὸν ἀνέστη.
<call. hymns. 3.129> οἷς δέ κεν εὐμειδής τε καὶ ἵλαος αὐγάσσηαι,
<call. hymns. 3.130> κείνοις εὖ μὲν ἄρουρα φέρει στάχυν, εὖ δὲ γενέθλη
<call. hymns. 3.131> τετραπόδων, εὖ δ' ὄλβος ἀέξεται: οὐδ' ἐπὶ σῆμα
<call. hymns. 3.132> ἔρχονται πλὴν εὖτε πολυχρόνιόν τι φέρωσιν:
<call. hymns. 3.133> οὐδὲ διχοστασίη τρώει γένος, ἥ τε καὶ εὖ περ
<call. hymns. 3.134> οἴκους ἑστηῶτας ἐσίνατο: ταὶ δὲ θυωρόν
<call. hymns. 3.135> εἰνάτερες γαλόωι τε μίαν πέρι δίφρα τίθενται.
<call. hymns. 3.136> πότνια, τῶν εἴη μὲν ἐμοὶ φίλος ὅστις ἀληθής,
<call. hymns. 3.137> εἴην δ' αὐτός, ἄνασσα, μέλοι δέ μοι αἰὲν ἀοιδή:
<call. hymns. 3.138> τῆι ἔνι μὲν Λητοῦς γάμος ἔσσεται, ἐν δὲ σὺ πολλή,
<call. hymns. 3.139> ἐν δὲ καὶ ̓Απόλλων, ἐν δ' οἵ σεο πάντες ἄεθλοι,
<call. hymns. 3.140> ἐν δὲ κύνες καὶ τόξα καὶ ἄντυγες, αἵ τέ σε ῥεῖα
<call. hymns. 3.141> θηητὴν φορέουσιν, ὅτ' ἐς Διὸς οἶκον ἐλαύνεις.
<call. hymns. 3.142> ἔνθα τοι ἀντιόωντες ἐνὶ προμολῆισι δέχονται
<call. hymns. 3.143> ὅπλα μὲν ̔Ερμείης ̓Ακακήσιος, αὐτὰρ ̓Απόλλων
<call. hymns. 3.144> θηρίον ὅττι φέρηισθα: πάροιθέ γέ, πρίν περ ἱκέσθαι
<call. hymns. 3.145> καρτερὸν ̓Αλκεΐδην: νῦν δ' οὐκέτι τοῦτον ἄεθλον
<call. hymns. 3.146> Φοῖβος ἔχει, τοῖος γὰρ ἀεὶ Τιρύνθιος ἄκμων
<call. hymns. 3.147> ἕστηκε πρὸ πυλέων ποτιδέγμενος, εἴ τι φέρουσα
<call. hymns. 3.148> νεῖαι πῖον ἔδεσμα: θεοὶ δ' ἐπὶ πάντες ἐκείνωι
<call. hymns. 3.149> ἄλληκτον γελόωσι, μάλιστα δὲ πενθερὴ αὐτή,
<call. hymns. 3.150> ταῦρον ὅτ' ἐκ δίφροιο μάλα μέγαν ἢ ὅ γε χλούνην
<call. hymns. 3.151> κάπρον ὀπισθιδίοιο φέροι ποδὸς ἀσπαίροντα:
<call. hymns. 3.152> κερδαλέωι μύθωι σε θεὴ μάλα τῶιδε πινύσκει
<call. hymns. 3.153> “βάλλε κακοὺς ἐπὶ θῆρας, ἵνα θνητοί σε βοηθόν
<call. hymns. 3.154> ὡς ἐμὲ κικλήσκωσιν. ἔα πρόκας ἠδὲ λαγωούς
<call. hymns. 3.155> οὔρεα βόσκεσθαι: τί κέ μιν πρόκες ἠὲ λαγωοί
<call. hymns. 3.156> ῥέξειαν; σύες ἔργα, σύες φυτὰ λυμαίνονται.
<call. hymns. 3.157> καὶ βόες ἀνθρώποισι κακὸν μέγα: βάλλ' ἐπὶ καὶ τούς.”
<call. hymns. 3.158> ὣς ἔνεπεν, ταχινὸς δὲ μέγαν περὶ θῆρα πονεῖτο.
<call. hymns. 3.159> οὐ γὰρ ὅ γε Φρυγίηι περ ὑπὸ δρυὶ γυῖα θεωθείς
<call. hymns. 3.160> παύσατ' ἀδηφαγίης: ἔτι οἱ πάρα νηδὺς ἐκείνη,
<call. hymns. 3.161> τῆι ποτ' ἀροτριόωντι συνήντετο Θειοδάμαντι.
<call. hymns. 3.162> σοὶ δ' ̓Αμνισιάδες μὲν ὑπὸ ζεύγληφι λυθείσας
<call. hymns. 3.163> ψήχουσιν κεμάδας, παρὰ δέ σφισι πουλὺ νέμεσθαι
<call. hymns. 3.164> ̔́Ηρης ἐκ λειμῶνος ἀμησάμεναι φορέουσιν
<call. hymns. 3.165> ὠκύθοον τριπέτηλον, ὃ καὶ Διὸς ἵπποι ἔδουσιν:
<call. hymns. 3.166> ἐν καὶ χρυσείας ὑποληνίδας ἐπλήσαντο
<call. hymns. 3.167> ὕδατος, ὄφρ' ἐλάφοισι ποτὸν θυμάρμενον εἴη.
<call. hymns. 3.168> αὐτὴ δ' ἐς πατρὸς δόμον ἔρχεαι: οἳ δέ ς' ἐφ' ἕδρην
<call. hymns. 3.169> πάντες ὁμῶς καλέουσι: σὺ δ' ̓Απόλλωνι παρίζεις.
<call. hymns. 3.170> ἡνίκα δ' αἱ νύμφαι σε χορῶι ἔνι κυκλώσονται
<call. hymns. 3.171> ἀγχόθι πηγάων Αἰγυπτίου ̓Ινωποῖο
<call. hymns. 3.172> ἢ Πιτάνης （καὶ γὰρ Πιτάνη σέθεν） ἢ ἐνὶ Λίμναις,
<call. hymns. 3.173> ἢ ἵνα δαῖμον ̓Αλὰς ̓Αραφηνίδας οἰκήσουσα
<call. hymns. 3.174> ἦλθες ἀπὸ Σκυθίης, ἀπὸ δ' εἴπαο τέθμια Ταύρων,
<call. hymns. 3.175> μὴ νειὸν τημοῦτος ἐμαὶ βόες εἵνεκα μισθοῦ
<call. hymns. 3.176> τετράγυον τέμνοιεν ὑπ' ἀλλοτρίωι ἀροτῆρι:
<call. hymns. 3.177> ἦ γάρ κεν γυιαί τε καὶ αὐχένα κεκμηυῖαι
<call. hymns. 3.178> κόπρον ἔπι προγένοιντο, καὶ εἰ Στυμφαιίδες εἶεν
<call. hymns. 3.179> εἰναετιζόμεναι κεραελκέες, αἳ μέγ' ἄρισται
<call. hymns. 3.180> τέμνειν ὦλκα βαθεῖαν: ἐπεὶ θεὸς οὔποτ' ἐκεῖνον
<call. hymns. 3.181> ἦλθε παρ' ̓Ηέλιος καλὸν χορόν, ἀλλὰ θεῆται
<call. hymns. 3.182> δίφρον ἐπιστήσας, τὰ δὲ φάεα μηκύνονται.
<call. hymns. 3.183> τίς δέ νύ τοι νήσων, ποῖον δ' ὄρος εὔαδε πλεῖστον,
<call. hymns. 3.184> τίς δὲ λιμήν, ποίη δὲ πόλις; τίνα δ' ἔξοχα νυμφέων
<call. hymns. 3.185> φίλαο, καὶ ποίας ἡρωίδας ἔσχες ἑταίρας;
<call. hymns. 3.186> εἰπὲ θεὴ σὺ μὲν ἄμμιν, ἐγὼ δ' ἑτέροισιν ἀείσω.
<call. hymns. 3.187> νήσων μὲν Δολίχη, πολίων δέ τοι εὔαδε Πέργη,
<call. hymns. 3.188> Τηύγετον δ' ὀρέων, λιμένες γε μὲν Εὐρίποιο.
<call. hymns. 3.189> ἔξοχα δ' ἀλλάων Γορτυνίδα φίλαο νύμφην,
<call. hymns. 3.190> ἐλλοφόνον Βριτόμαρτιν ἐύσκοπον: ἧς ποτε Μίνως
<call. hymns. 3.191> πτοιηθεὶς ὑπ' ἔρωτι κατέδραμεν οὔρεα Κρήτης.
<call. hymns. 3.192> ἣ δ' ὁτὲ μὲν λασίηισιν ὑπὸ δρυσὶ κρύπτετο νύμφη,
<call. hymns. 3.193> ἄλλοτε δ' εἱαμενῆισιν: ὃ δ' ἐννέα μῆνας ἐφοίτα
<call. hymns. 3.194> παίπαλά τε κρημνούς τε καὶ οὐκ ἀνέπαυσε διωκτύν,
<call. hymns. 3.195> μέσφ' ὅτε μαρπτομένη καὶ δὴ σχεδὸν ἥλατο πόντον
<call. hymns. 3.196> πρηόνος ἐξ ὑπάτοιο καὶ ἔνθορεν εἰς ἁλιήων
<call. hymns. 3.197> δίκτυα, τά σφ' ἐσάωσαν: ὅθεν μετέπειτα Κύδωνες
<call. hymns. 3.198> νύμφην μὲν Δίκτυναν, ὄρος δ' ὅθεν ἥλατο νύμφη
<call. hymns. 3.199> Δικταῖον καλέουσιν, ἀνεστήσαντο δὲ βωμούς
<call. hymns. 3.200> ἱερά τε ῥέζουσι: τὸ δὲ στέφος ἤματι κείνωι
<call. hymns. 3.201> ἢ πίτυς ἢ σχῖνος, μύρτοιο δὲ χεῖρες ἄθικτοι:
<call. hymns. 3.202> δὴ τότε γὰρ πέπλοισιν ἐνέσχετο μύρσινος ὄζος
<call. hymns. 3.203> τῆς κούρης, ὅτ' ἔφευγεν: ὅθεν μέγα χώσατο μύρτωι.
<call. hymns. 3.204> Οὖπι ἄνασς' εὐῶπι φαεσφόρε, καὶ δὲ σὲ κείνην
<call. hymns. 3.205> Κρηταέες καλέουσιν ἐπωνυμίην ἀπὸ νύμφης.
<call. hymns. 3.206> καὶ μὴν Κυρήνην ἑταρίσσαο, τῆι ποτ' ἔδωκας
<call. hymns. 3.207> αὐτὴ θηρητῆρε δύω κύνε, τοῖς ἔνι κούρη
<call. hymns. 3.208> ̔Υψηὶς παρὰ τύμβον ̓Ιώλκιον ἔμμορ' ἀέθλου.
<call. hymns. 3.209> καὶ Κεφάλου ξανθὴν ἄλοχον Δηιονίδαο
<call. hymns. 3.210> πότνια σὴν ὁμόθηρον ἐθήκαο: καὶ δὲ σὲ φασί
<call. hymns. 3.211> καλὴν ̓Αντίκλειαν ἴσον φαέεσσι φιλῆσαι,
<call. hymns. 3.212> αἳ πρῶται θοὰ τόξα καὶ ἀμφ' ὤμοισι φαρέτρας
<call. hymns. 3.213> ἰοδόκους ἐφόρησαν: ἀσύλλωτοι δέ φιν ὦμοι
<call. hymns. 3.214> δεξιτεροὶ καὶ γυμνὸς ἀεὶ παρεφαίνετο μαζός.
<call. hymns. 3.215> ἤινησας δ' ἔτι πάγχυ ποδορρώρην ̓Αταλάντην,
<call. hymns. 3.216> κούρην ̓Ιασίοιο συοκτόνον ̓Αρκασίδαο,
<call. hymns. 3.217> καί ἑ κυνηλασίην τε καὶ εὐστοχίην ἐδίδαξας.
<call. hymns. 3.218> οὔ μιν ἐπίκλητοι Καλυδωνίου ἀγρευτῆρες
<call. hymns. 3.219> μέμφονται κάπροιο: τὰ γὰρ σημήια νίκης
<call. hymns. 3.220> ̓Αρκαδίην εἰσῆλθεν, ἔχει δ' ἔτι θηρὸς ὀδόντας:
<call. hymns. 3.221> οὐδὲ μὲν ̔Υλαῖόν τε καὶ ἄφρονα ̔Ροῖκον ἔολπα
<call. hymns. 3.222> οὐδέ περ ἐχθαίροντας ἐν ̓́Αιδι μωμήσασθαι
<call. hymns. 3.223> τοξότιν: οὐ γάρ σφιν λαγόνες συνεπιψεύσονται,
<call. hymns. 3.224> τάων Μαιναλίη νᾶεν φόνωι ἀκρώρεια.
<call. hymns. 3.225> πότνια πουλυμέλαθρε πολύπτολι χαῖρε Χιτώνη
<call. hymns. 3.226> Μιλήτωι ἐπίδημε: σὲ γὰρ ποιήσατο Νηλεύς
<call. hymns. 3.227> ἡγεμόνην, ὅτε νηυσὶν ἀνήγετο Κεκροπίηθεν.
<call. hymns. 3.228> Χησιὰς ̓Ιμβρασίη πρωτόθρονε, σοὶ δ' ̓Αγαμέμνων
<call. hymns. 3.229> πηδάλιον νηὸς σφετέρης ἐγκάτθετο νηῶι
<call. hymns. 3.230> μείλιον ἀπλοΐης, ὅτε οἱ κατέδησας ἀήτας,
<call. hymns. 3.231> Τευκρῶν ἡνίκα νῆες ̓Αχαιίδες ἄστεα κήδειν
<call. hymns. 3.232> ἔπλεον ἀμφ' ̔Ελένηι ̔Ραμνουσίδι θυμωθεῖσαι.
<call. hymns. 3.233> ἦ μέν τοι Προῖτός γε δύω ἐκαθίσσατο νηούς,
<call. hymns. 3.234> ἄλλον μὲν Κορίης, ὅτι οἱ συνελέξαο κούρας
<call. hymns. 3.235> οὔρεα πλαζομένας ̓Αζήνια, τὸν δ' ἐνὶ Λούσοις
<call. hymns. 3.236> ̔Ημέρηι, οὕνεκα θυμὸν ἀπ' ἄγριον εἵλεο παίδων.
<call. hymns. 3.237> σοὶ καὶ ̓Αμαζονίδες πολέμου ἐπιθυμήτειραι
<call. hymns. 3.238> ἔν ποτε παρραλίηι ̓Εφέσωι βρέτας ἱδρύσαντο
<call. hymns. 3.239> φηγῶι ὑπὸ πρέμνωι, τέλεσεν δέ τοι ἱερὸν ̔Ιππώ:
<call. hymns. 3.240> αὐταὶ δ', Οὖπι ἄνασσα, περὶ πρύλιν ὠρχήσαντο
<call. hymns. 3.241> πρῶτα μὲν ἐν σακέεσσιν ἐνόπλιον, αὖθι δὲ κύκλωι
<call. hymns. 3.242> στησάμεναι χορὸν εὐρύν: ὑπήεισαν δὲ λίγειαι
<call. hymns. 3.243> λεπταλέον σύριγγες, ἵνα ῥήσσωσιν ὁμαρτῆι
<call. hymns. 3.244> （οὐ γάρ πω νέβρεια δι' ὀστέα τετρήναντο,
<call. hymns. 3.245> ἔργον ̓Αθηναίης ἐλάφωι κακόν）: ἔδραμε δ' ἠχώ
<call. hymns. 3.246> Σάρδιας ἔς τε νομὸν Βερεκύνθιον. αἳ δὲ πόδεσσιν
<call. hymns. 3.247> οὖλα κατεκροτάλιζον, ἐπεψόφεον δὲ φαρέτραι.
<call. hymns. 3.248> κεῖνο δέ τοι μετέπειτα περὶ βρέτας εὐρὺ θέμειλον
<call. hymns. 3.249> δωμήθη, τοῦ δ' οὔτι θεώτερον ὄψεται ἠώς
<call. hymns. 3.250> οὐδ' ἀφνειότερον: ῥέα κεν Πυθῶνα παρέλθοι.
<call. hymns. 3.251> τῶι ῥα καὶ ἠλαίνων ἀλαπαξέμεν ἠπείλησε
<call. hymns. 3.252> Λύγδαμις ὑβριστής: ἐπὶ δὲ στρατὸν ἱππημολγῶν
<call. hymns. 3.253> ἤγαγε Κιμμερίων ψαμάθωι ἴσον, οἵ ῥα παρ' αὐτόν
<call. hymns. 3.254> κεκλιμένοι ναίουσι βοὸς πόρον ̓Ιναχιώνης.
<call. hymns. 3.255> ἆ δειλὸς βασιλέων, ὅσον ἤλιτεν: οὐ γὰρ ἔμελλεν
<call. hymns. 3.256> οὔτ' αὐτὸς Σκυθίηνδε παλιμπετὲς οὔτε τις ἄλλος
<call. hymns. 3.257> ὅσσων ἐν λειμῶνι Καϋστρίωι ἔσταν ἅμαζαι
<call. hymns. 3.258> νοστήσειν: ̓Εφέσου γὰρ ἀεὶ τεὰ τόξα πρόκειται.
<call. hymns. 3.259> πότνια Μουνιχίη λιμενοσκόπε, χαῖρε Φεραίη.
<call. hymns. 3.260> μή τις ἀτιμήσηι τὴν ̓́Αρτεμιν （οὐδὲ γὰρ Οἰνεῖ
<call. hymns. 3.261> βωμὸν ἀτιμάσσαντι καλοὶ πόλιν ἦλθον ἀγῶνες）,
<call. hymns. 3.262> μηδ' ἐλαφηβολίην μηδ' εὐστοχίην ἐριδαίνειν
<call. hymns. 3.263> （οὐδὲ γὰρ ̓Ατρεΐδης ὀλίγωι ἔπι κόμπασε μισθῶι）,
<call. hymns. 3.264> μηδέ τινα μνᾶσθαι τὴν παρθένον （οὐδὲ γὰρ ̓͂Ωτος,
<call. hymns. 3.265> οὐδὲ μὲν ̓Ωαρίων ἀγαθὸν γάμον ἐμνήστευσαν）,
<call. hymns. 3.266> μηδὲ χορὸν φεύγειν ἐνιαύσιον （οὐδὲ γὰρ ̔Ιππώ
<call. hymns. 3.267> ἀκλαυτεὶ περὶ βωμὸν ἀπείπατο κυκλώσασθαι）:
<call. hymns. 3.268> χαῖρε μέγα κρείουσα καὶ εὐάντησον ἀοιδῆι.
<call. hymns. 4.1> τὴν ἱερήν, ὦ θυμέ, τίνα χρόνον ἢ πότ' ἀείσεις
<call. hymns. 4.2> δῆλον, ̓Απόλλωνος κουροτρόφον; ἦ μὲν ἅπασαι
<call. hymns. 4.3> Κυκλάδες, αἳ νήσων ἱερώταται εἰν ἁλὶ κεῖνται,
<call. hymns. 4.4> εὔυμνοι: δῆλος δ' ἐθέλει τὰ πρῶτα φέρεσθαι
<call. hymns. 4.5> ἐκ Μουσέων, ὅτι Φοῖβον ἀοιδάων μεδέοντα
<call. hymns. 4.6> λοῦσέ τε καὶ σπείρωσε καὶ ὡς θεὸν ἤινεσε πρώτη.
<call. hymns. 4.7> ὡς Μοῦσαι τὸν ἀοιδὸν ὃ μὴ Πίμπλειαν ἀείσηι
<call. hymns. 4.8> ἔχθουσιν, τὼς Φοῖβος ὅτις Δήλοιο λάθηται.
<call. hymns. 4.9> Δήλωι νῦν οἴμης ἀποδάσσομαι, ὡς ἂν ̓Απόλλων
<call. hymns. 4.10> Κύνθιος αἰνήσηι με φίλης ἀλέγοντα τιθήνης.
<call. hymns. 4.11> κείνη δ' ἠνεμόεσσα καὶ ἄτροπος οἷά θ' ἁλιπλήξ
<call. hymns. 4.12> αἰθυίηις καὶ μᾶλλον ἐπίδρομος ἠέπερ ἵπποις
<call. hymns. 4.13> πόντωι ἐνεστήρικται: ὃ δ' ἀμφί ἑ πουλὺς ἑλίσσων
<call. hymns. 4.14> ̓Ικαρίου πολλὴν ἀπομάσσεται ὕδατος ἄχνην:
<call. hymns. 4.15> τῶι σφε καὶ ἰχθυβολῆες ἁλίπλοοι ἐννάσσαντο.
<call. hymns. 4.16> ἀλλά οἱ οὐ νεμεσητὸν ἐνὶ πρώτηισι λέγεσθαι,
<call. hymns. 4.17> ὁππότ' ἐς ̓Ωκεανόν τε καὶ ἐς Τιτηνίδα Τηθύν
<call. hymns. 4.18> νῆσοι ἀολλίζονται, ἀεὶ δ' ἔξαρχος ὁδεύει.
<call. hymns. 4.19> ἣ δ' ὄπιθεν Φοίνισσα μετ' ἴχνια Κύρνος ὀπηδεῖ
<call. hymns. 4.20> οὐκ ὀνοτὴ καὶ Μάκρις ̓Αβαντιὰς ̓Ελλοπιήων
<call. hymns. 4.21> Σαρδώ θ' ἱμερόεσσα καὶ ἣν ἐπενήξατο Κύπρις
<call. hymns. 4.22> ἐξ ὕδατος τὰ πρῶτα, σαοῖ δέ μιν ἀντ' ἐπιβάθρων.
<call. hymns. 4.23> κεῖναι μὲν πύργοισι περισκεπέεσσιν ἐρυμναί,
<call. hymns. 4.24> δῆλος δ' ̓Απόλλωνι: τί δὲ στιβαρώτερον ἕρκος;
<call. hymns. 4.25> τείχεα μὲν καὶ λᾶες ὑπαὶ ῥιπῆς κε πέσοιεν
<call. hymns. 4.26> Στρυμονίου βορέαο: θεὸς δ' ἀεὶ ἀστυφέλικτος:
<call. hymns. 4.27> Δῆλε φίλη, τοῖός σε βοηθόος ἀμφιβέβηκεν.
<call. hymns. 4.28> εἰ δὲ λίην πολέες σε περιτροχόωσιν ἀοιδαί,
<call. hymns. 4.29> ποίηι ἐνιπλέξω σε; τί τοι θυμῆρες ἀκοῦσαι;
<call. hymns. 4.30> ἢ ὡς τὰ πρώτιστα μέγας θεὸς οὔρεα θείνων
<call. hymns. 4.31> ἄορι τριγλώχινι, τό οἱ Τελχῖνες ἔτευξαν,
<call. hymns. 4.32> νήσους εἰναλίας εἰργάζετο, νέρθε δ' ἐλάσσας
<call. hymns. 4.33> ἐκ νεάτων ὤχλισσε καὶ εἰσεκύλισε θαλάσσηι;
<call. hymns. 4.34> καὶ τὰς μὲν κατὰ βυσσόν, ἵν' ἠπείροιο λάθωνται,
<call. hymns. 4.35> πρυμνόθεν ἐρρίζωσε: σὲ δ' οὐκ ἔθλιψεν ἀνάγκη,
<call. hymns. 4.36> ἀλλ' ἄφετος πελάγεσσιν ἐπέπλεες, οὔνομα δ' ἦν τοι
<call. hymns. 4.37> ̓Αστερίη τὸ παλαιόν, ἐπεὶ βαθὺν ἥλαο τάφρον
<call. hymns. 4.38> οὐρανόθεν φεύγουσα Διὸς γάμον ἀστέρι ἴση.
<call. hymns. 4.39> τόφρα μὲν οὔπω τοι χρυσέη ἐπεμίσγετο Λητώ,
<call. hymns. 4.40> τόφρα δ' ἔτ' ̓Αστερίη σὺ καὶ οὐδέπω ἔκλεο Δῆλος.
<call. hymns. 4.41> πολλάκι σε Τροιζῆνος ἀπὸ ξάνθοιο πολίχνης
<call. hymns. 4.42> ἐρχόμενοι ̓Εφύρηνδε Σαρωνικοῦ ἔνδοθι κόλπου
<call. hymns. 4.43> ναῦται ἐπεσκέψαντο, καὶ ἐξ ̓Εφύρης ἀνιόντες
<call. hymns. 4.44> οἳ μὲν ἔτ' οὐκ ἴδον αὖθι, σὺ δὲ στεινοῖο παρ' ὀξύν
<call. hymns. 4.45> ἔδραμες Εὐρίποιο πόρον καναχηδὰ ῥέοντος,
<call. hymns. 4.46> Χαλκιδικῆς δ' αὐτῆμαρ ἀνηναμένη ἁλὸς ὕδωρ
<call. hymns. 4.47> μέσφ' ἐς ̓Αθηναίων προσενήξαο Σούνιον ἄκρον
<call. hymns. 4.48> ἢ Χίον ἢ νήσοιο διάβροχον ὕδατι μαστόν
<call. hymns. 4.49> παρθενίης （οὔπω γὰρ ἔην Σάμος）, ἧχί σε νύμφαι
<call. hymns. 4.50> γείτονες ̓Αγκαίου Μυκαλησσίδες ἐξείνισσαν.
<call. hymns. 4.51> ἡνίκα δ' ̓Απόλλωνι γενέθλιον οὖδας ὑπέσχες,
<call. hymns. 4.52> τοῦτό τοι ἀντημοιβὸν ἁλίπλοοι οὔνομ' ἔθεντο,
<call. hymns. 4.53> οὕνεκεν οὐκέτ' ἄδηλος ἐπέπλεες, ἀλλ' ἐνὶ πόντου
<call. hymns. 4.54> κύμασιν Αἰγαίοιο ποδῶν ἐνεθήκαο ῥίζας.
<call. hymns. 4.55> οὐδ' ̔́Ηρην κοτέουσαν ὑπέτρεσας: ἣ μὲν ἁπάσαις
<call. hymns. 4.56> δεινὸν ἐπεβρωμᾶτο λεχωίσιν αἳ Διὶ παῖδας
<call. hymns. 4.57> ἐξέφερον, Λητοῖ δὲ διακριδόν, οὕνεκα μούνη
<call. hymns. 4.58> Ζηνὶ τεκεῖν ἤμελλε φιλαίτερον ̓́Αρεος υἷα.
<call. hymns. 4.59> τῶι ῥα καὶ αὐτὴ μὲν σκοπιὴν ἔχεν αἰθέρος εἴσω
<call. hymns. 4.60> σπερχομένη μέγα δή τι καὶ οὐ φατόν, εἶργε δὲ Λητώ
<call. hymns. 4.61> τειρομένην ὠδῖσι: δύω δέ οἱ εἵατο φρουροί
<call. hymns. 4.62> γαῖαν ἐποπτεύοντες, ὃ μὲν πέδον ἠπείροιο
<call. hymns. 4.63> ἥμενος ὑψηλῆς κορυφῆς ἔπι Θρήικος Αἵμου
<call. hymns. 4.64> θοῦρος ̓́Αρης ἐφύλασσε σὺν ἔντεσι, τὼ δέ οἱ ἵππω
<call. hymns. 4.65> ἑπτάμυχον βορέαο παρὰ σπέος ηὐλίζοντο:
<call. hymns. 4.66> ἣ δ' ἐπὶ νησάων ἑτέρη σκοπὸς εὐρειάων
<call. hymns. 4.67> ἧστο κόρη Θαύμαντος ἐπαΐξασα Μίμαντι.
<call. hymns. 4.68> ἔνθ' οἳ μὲν πολίεσσιν ὅσαις ἐπεβάλλετο Λητώ
<call. hymns. 4.69> μίμνον ἀπειλητῆρες, ἀπετρώπων δὲ δέχεσθαι.
<call. hymns. 4.70> φεῦγε μὲν ̓Αρκαδίη, φεῦγεν δ' ὄρος ἱερὸν Αὔγης
<call. hymns. 4.71> Παρθένιον, φεῦγεν δ' ὁ γέρων μετόπισθε Φενειός.
<call. hymns. 4.72> φεῦγε δ' ὅλη Πελοπηὶς ὅση παρακέκλιται ̓Ισθμῶι,
<call. hymns. 4.73> ἔμπλην Αἰγιαλοῦ γε καὶ ̓́Αργεος: οὐ γὰρ ἐκείνας
<call. hymns. 4.74> ἀτραπιτοὺς ἐπάτησεν, ἐπεὶ λάχεν ̓́Ιναχον ̔́Ηρη.
<call. hymns. 4.75> φεῦγε καὶ ̓Αονίη τὸν ἕνα δρόμον, αἳ δ' ἐφέποντο
<call. hymns. 4.76> Δίρκη τε Στροφίη τε μελαμψήφιδος ἔχουσαι
<call. hymns. 4.77> ̓Ισμηνοῦ χέρα πατρός, ὃ δ' εἵπετο πολλὸν ὄπισθεν
<call. hymns. 4.78> ̓Ασωπὸς βαρύγουνος, ἐπεὶ πεπάλακτο κεραυνῶι.
<call. hymns. 4.79> ἣ δ' ὑποδινηθεῖσα χοροῦ ἀπεπαύσατο νύμφη
<call. hymns. 4.80> αὐτόχθων Μελίη καὶ ὑπόχλοον ἔσχε παρειήν
<call. hymns. 4.81> ἥλικος ἀσθμαίνουσα περὶ δρυός, ὡς ἴδε χαίτην
<call. hymns. 4.82> σειομένην ̔Ελικῶνος. ἐμαὶ θεαί, εἴπατε Μοῦσαι,
<call. hymns. 4.83> ἦ ῥ' ἐτεὸν ἐγένοντο τότε δρύες ἡνίκα Νύμφαι;
<call. hymns. 4.84> “νύμφαι μὲν χαίρουσιν, ὅτε δρύας ὄμβρος ἀέξει,
<call. hymns. 4.85> νύμφαι δ' αὖ κλαίουσιν, ὅτε δρυσὶν οὐκέτι φύλλα.”
<call. hymns. 4.86> ταῖς μὲν ἔτ' ̓Απόλλων ὑποκόλπιος αἰνὰ χολώθη,
<call. hymns. 4.87> φθέγξατο δ' οὐκ ἀτέλεστον ἀπειλήσας ἐπὶ Θήβηι:
<call. hymns. 4.88> ̔Θήβη τίπτε τάλαινα τὸν αὐτίκα πότμον ἐλέγχεις;
<call. hymns. 4.89> μήπω μή μ' ἀέκοντα βιάζεο μαντεύεσθαι.
<call. hymns. 4.90> οὔπω μοι Πυθῶνι μέλει τριποδήιος ἕδρη,
<call. hymns. 4.91> οὐδέ τί πω τέθνηκεν ὄφις μέγας, ἀλλ' ἔτι κεῖνο
<call. hymns. 4.92> θηρίον αἰνογένειον ἀπὸ Πλειστοῖο καθέρπον
<call. hymns. 4.93> Παρνησὸν νιφόεντα περιστέφει ἐννέα κύκλοις:
<call. hymns. 4.94> ἀλλ' ἔμπης ἐρέω τι τορώτερον ἢ ἀπὸ δάφνης.
<call. hymns. 4.95> φεῦγε πρόσω: ταχινός σε κιχήσομαι αἵματι λούσων
<call. hymns. 4.96> τόξον ἐμόν: σὺ δὲ τέκνα κακογλώσσοιο γυναικός
<call. hymns. 4.97> ἔλλαχες. οὐ σύ γ' ἐμεῖο φίλη τροφὸς οὐδὲ Κιθαιρών
<call. hymns. 4.98> ἔσσεται: εὐαγέων δὲ καὶ εὐαγέεσσι μελοίμην'.
<call. hymns. 4.99> ὣς ἄρ' ἔφη. Λητὼ δὲ μετάτροπος αὖτις ἐχώρει.
<call. hymns. 4.100> ἀλλ' ὅτ' ̓Αχαιιάδες μιν ἀπηρνήσαντο πόληες
<call. hymns. 4.101> ἐρχομένην, ̔Ελίκη τε Ποσειδάωνος ἑταίρη
<call. hymns. 4.102> Βοῦρά τε Δεξαμενοῖο βοόστασις Οἰκιάδαο,
<call. hymns. 4.103> ἄψ δ' ἐπὶ Θεσσαλίην πόδας ἔτρεπε, φεῦγε δ' ̓́Αναυρος
<call. hymns. 4.104> καὶ μεγάλη Λάρισα καὶ αἱ Χειρωνίδες ἄκραι,
<call. hymns. 4.105> φεῦγε δὲ καὶ Πηνειὸς ἑλισσόμενος διὰ Τεμπέων:
<call. hymns. 4.106> ́Ηρη σοὶ δ' ἔτι τῆμος ἀνηλεὲς ἦτορ ἔκειτο
<call. hymns. 4.107> οὐδὲ κατεκλάσθης τε καὶ ὤικτισας, ἡνίκα πήχεις
<call. hymns. 4.108> ἀμφοτέρους ὀρέγουσα μάτην ἐφθέγξατο τοῖα
<call. hymns. 4.109> 'Νύμφαι Θεσσαλίδες, ποταμοῦ γένος, εἴπατε πατρί
<call. hymns. 4.110> κοιμῆσαι μέγα χεῦμα: περιπλέξασθε γενείωι
<call. hymns. 4.111> λισσόμεναι τὰ Ζηνὸς ἐν ὕδατι τέκνα τεκέσθαι.
<call. hymns. 4.112> Πηνειὲ Φθιῶτα, τί νῦν ἀνέμοισιν ἐρίζεις;
<call. hymns. 4.113> ὦ πάτερ, οὐ μὴν ἵππον ἀέθλιον ἀμφιβέβηκας.
<call. hymns. 4.114> ἦ ῥά τοι ὧδ' αἰεὶ ταχινοὶ πόδες, ἢ ἐπ' ἐμεῖο
<call. hymns. 4.115> μοῦνοι ἐλαφρίζουσι, πεποίησαι δὲ πέτεσθαι
<call. hymns. 4.116> σήμερον ἐξαπίνης;' ὃ δ' ἀνήκοος. 'ὦ ἐμὸν ἄχθος,
<call. hymns. 4.117> ποῖ σε φέρω; μέλεοι γὰρ ἀπειρήκασι τένοντες.
<call. hymns. 4.118> Πήλιον ὦ Φιλύρης νυμφήιον, ἀλλὰ σὺ μεῖνον,
<call. hymns. 4.119> μεῖνον, ἐπεὶ καὶ θῆρες ἐν οὔρεσι πολλάκι σεῖο
<call. hymns. 4.120> ὠμοτόκους ὠδῖνας ἀπηρείσαντο λέαιναι.'
<call. hymns. 4.121> τὴν δ' ἄρα καὶ Πηνειὸς ἀμείβετο δάκρυα λείβων
<call. hymns. 4.122> 'λητοῖ, ̓Αναγκαίη μεγάλη θεός. οὐ γὰρ ἔγωγε
<call. hymns. 4.123> πότνια σὰς ὠδῖνας ἀναίνομαι （οἶδα καὶ ἄλλας
<call. hymns. 4.124> λουσαμένας ἀπ' ἐμεῖο λεχωίδας）: ἀλλά μοι ̔́Ηρη
<call. hymns. 4.125> δαψιλὲς ἠπείλησεν. ἀπαύγασαι, οἷος ἔφεδρος
<call. hymns. 4.126> οὔρεος ἐξ ὑπάτου σκοπιὴν ἔχει, ὅς κέ με ῥεῖα
<call. hymns. 4.127> βυσσόθεν ἐξερύσειε. τί μήσομαι; ἢ ἀπολέσθαι
<call. hymns. 4.128> ἡδύ τί τοι Πηνειόν; ἴτω πεπρωμένον ἦμαρ:
<call. hymns. 4.129> τλήσομαι εἵνεκα σεῖο καὶ εἰ μέλλοιμι ῥοάων
<call. hymns. 4.130> διψαλέην ἄμπωτιν ἔχων αἰώνιον ἔρρειν
<call. hymns. 4.131> καὶ μόνος ἐν ποταμοῖσιν ἀτιμότατος καλέεσθαι.
<call. hymns. 4.132> ἠνίδ' ἐγώ: τί περισσά; κάλει μόνον Εἰλήθυιαν.'
<call. hymns. 4.133> εἶπε καὶ ἠρώησε μέγαν ῥόον. ἀλλά οἱ ̓́Αρης
<call. hymns. 4.134> Παγγαίου προθέλυμνα καρήατα μέλλεν ἀείρας
<call. hymns. 4.135> ἐμβαλέειν δίνηισιν, ἀποκρύψαι δὲ ῥέεθρα:
<call. hymns. 4.136> ὑψόθε δ' ἐσμαράγησε καὶ ἀσπίδα τύψεν ἀκωκῆι
<call. hymns. 4.137> δούρατος: ἣ δ' ἐλέλιξεν ἐνόπλιον: ἔτρεμε δ' ̓́Οσσης
<call. hymns. 4.138> οὔρεα καὶ πεδίον Κραννώνιον αἵ τε δυσαεῖς
<call. hymns. 4.139> ἐσχατιαὶ Πίνδοιο, φόβωι δ' ὠρχήσατο πᾶσα
<call. hymns. 4.140> Θεσσαλίη: τοῖος γὰρ ἀπ' ἀσπίδος ἔβραμεν ἦχος.
<call. hymns. 4.141> ὡς δ' ὁπότ' Αἰτναίου ὄρεος πυρὶ τυφομένοιο
<call. hymns. 4.142> σείονται μυχὰ πάντα κατουδαίοιο γίγαντος
<call. hymns. 4.143> εἰς ἑτέρην Βριαρῆος ἐπωμίδα κινυμένοιο,
<call. hymns. 4.144> θερμάστραι τε βρέμουσιν ὑφ' ̔Ηφαίστοιο πυράγρης
<call. hymns. 4.145> ἔργα θ' ὁμοῦ, δεινὸν δὲ πυρίκμητοί τε λέβητες
<call. hymns. 4.146> καὶ τρίποδες πίπτοντες ἐπ' ἀλλήλοις ἰαχεῦσι:
<call. hymns. 4.147> τῆμος ἔγεντ' ἄραβος σάκεος τόσος εὐκύκλοιο:
<call. hymns. 4.148> Πηνειὸς δ' οὐκ αὖτις ἐχάζετο, μίμνε δ' ὁμοίως
<call. hymns. 4.149> καρτερὸς ὡς τὰ πρῶτα, θοὰς δ' ἐστήσατο δίνας,
<call. hymns. 4.150> εἰσόκε οἱ Κοιηὶς ἐκέκλετο 'σώιζεο χαίρων,
<call. hymns. 4.151> σώιζεο: μὴ σύ γ' ἐμεῖο πάθηις κακὸν εἵνεκα τῆσδε
<call. hymns. 4.152> ἀντ' ἐλεημοσύνης, χάριτος δέ τοι ἔσσετ' ἀμοιβή'.
<call. hymns. 4.153> ἦ καὶ πολλὰ πάροιθεν ἐπεὶ κάμεν ἔστιχε νήσους
<call. hymns. 4.154> εἰναλίας: αἳ δ' οὔ μιν ἐπερχομένην ἐδέχοντο,
<call. hymns. 4.155> οὐ λιπαρὸν νήεσσιν ̓Εχινάδες ὅρμον ἔχουσαι,
<call. hymns. 4.156> οὐδ' ἥτις Κέρκυρα φιλοξεινωτάτη ἄλλων,
<call. hymns. 4.157> ̓͂Ιρις ἐπεὶ πάσηισιν ἐφ' ὑψηλοῖο Μίμαντος
<call. hymns. 4.158> σπερχομένη μάλα πολλὸν ἀπέτραπεν: αἳ δ' ὑπ' ὀμοκλῆς
<call. hymns. 4.159> πανσυδίηι φοβέοντο κατὰ ρῥόον ἥντινα τέτμοι.
<call. hymns. 4.160> ὠγυγίην δἤπειτα Κόων, Μεροπηίδα νῆσον,
<call. hymns. 4.161> ἵκετο, Χαλκιόπης ἱερὸν μυχὸν ἡρωίνης.
<call. hymns. 4.162> ἀλλά ἑ παιδὸς ἔρυκεν ἔπος τόδε 'μὴ σύ γε μῆτερ
<call. hymns. 4.163> τῆι με τέκοις. οὔτ' οὖν ἐπιμέμφομαι οὐδὲ μεγαίρω
<call. hymns. 4.164> νῆσον, ἐπεὶ λιπαρή τε καὶ εὔβοτος, εἴ νύ τις ἄλλη:
<call. hymns. 4.165> ἀλλά οἱ ἐκ Μοιρέων τις ὀφειλόμενος θεὸς ἄλλος
<call. hymns. 4.166> ἐστί, Σαωτήρων ὕπατον γένος: ὧι ὑπὸ μίτρην
<call. hymns. 4.167> ἵξεται οὐκ ἀέκουσα Μακηδόνι κοιρανέεσθαι
<call. hymns. 4.168> ἀμφοτέρη μεσόγεια καὶ αἳ πελάγεσσι κάθηνται,
<call. hymns. 4.169> μέχρις ὅπου περάτη τε καὶ ὁππόθεν ὠκέες ἵπποι
<call. hymns. 4.170> ἠέλιον φορέουσιν: ὃ δ' εἴσεται ἤθεα πατρός.
<call. hymns. 4.171> καί νύ ποτε ξυνός τις ἐλεύσεται ἄμμιν ἄεθλος
<call. hymns. 4.172> ὕστερον, ὁππότ' ἂν οἳ μὲν ἐφ' ̔Ελλήνεσσι μάχαιραν
<call. hymns. 4.173> βαρβαρικὴν καὶ Κελτὸν ἀναστήσαντες ̓́Αρηα
<call. hymns. 4.174> ὀψίγονοι Τιτῆνες ἀφ' ἑσπέρου ἐσχατόωντος
<call. hymns. 4.175> ῥώσωνται νιφάδεσσιν ἐοικότες ἢ ἰσάριθμοι
<call. hymns. 4.176> τείρεσιν, ἡνίκα πλεῖστα κατ' ἠέρα βουκολέονται,
<call. hymns. 4.177> φρούρια καὶ
<call. hymns. 4.178> καὶ πεδία Κρισσαῖα καὶ ἤπειροι
<call. hymns. 4.179> ἀμφιπεριστείνωνται, ἴδωσι δὲ πίονα καπνὸν
<call. hymns. 4.180> γείτονος αἰθομένοιο, καὶ οὐκέτι μοῦνον ἀκουῆι,
<call. hymns. 4.181> ἀλλ' ἤδη παρὰ νηὸν ἀπαυγάζωνται † φάλαγγες
<call. hymns. 4.182> δυσμενέων, ἤδη δὲ παρὰ τριπόδεσσιν ἐμεῖο
<call. hymns. 4.183> φάσγανα καὶ ζωστῆρας ἀναιδέας ἐχθομένας τε
<call. hymns. 4.184> ἀσπίδας, αἳ Γαλάτηισι κακὴν ὁδὸν ἄφρονι φύλωι
<call. hymns. 4.185> στήσονται: τέων αἳ μὲν ἐμοὶ γέρας, αἳ δ' ἐπὶ Νείλωι
<call. hymns. 4.186> ἐν πυρὶ τοὺς φορέοντας ἀποπνεύσαντας ἰδοῦσαι
<call. hymns. 4.187> κείσονται βασιλῆος ἀέθλια πολλὰ καμόντος.
<call. hymns. 4.188> ἐσσόμενε Πτολεμαῖε, τά τοι μαντήια φαίνω.
<call. hymns. 4.189> αἰνήσεις μέγα δή τι τὸν εἰσέτι γαστέρι μάντιν
<call. hymns. 4.190> ὕστερον ἤματα πάντα: σὺ δὲ ξυμβάλλεο μῆτερ:
<call. hymns. 4.191> ἔστι διειδομένη τις ἐν ὕδατι νήσος ἀραιή,
<call. hymns. 4.192> πλαζομένη πελάγεσσι: πόδες δέ οἱ οὐχ ἑνὶ χώρωι,
<call. hymns. 4.193> ἀλλὰ παλιρροίηι ἐπινήχεται ἀνθέρικος ὥς,
<call. hymns. 4.194> ἔνθα νότος, ἔνθ' εὖρος, ὅπη φορέηισι θάλασσα.
<call. hymns. 4.195> τῆι με φέροις: κείνην γὰρ ἐλεύσεαι εἰς ἐθέλουσαν.'
<call. hymns. 4.196> αἳ μὲν τόσσα λέγοντος ἀπέτρεχον εἰν ἁλὶ νῆσοι:
<call. hymns. 4.197> ̓Αστερίη φιλόμολπε, σὺ δ' Εὐβοίηθε κατήιεις,
<call. hymns. 4.198> Κυκλάδας ὀψομένη περιηγέας, οὔ τι παλαιόν,
<call. hymns. 4.199> ἀλλ' ἔτι τοι μετόπισθε Γεραίστιον εἵπετο φῦκος:
<call. hymns. 4.201> φλεξας ἐπεὶ περικαίεο πυρί,
<call. hymns. 4.202> τλήμον' ὑπ' ὠδίνεσσι βαρυνομένην ὁρόωσα:
<call. hymns. 4.203> '̔́Ηρη τοῦτό με ῥέξον ὅ τοι φίλον: οὐ γάρ ἀπειλὰς
<call. hymns. 4.204> ὑμετέρας ἐφύλαξα: πέρα, πέρα εἰς ἐμὲ Λητοῖ'.
<call. hymns. 4.205> ἔννεπες: ἣ δ' ἀρητὸν ἄλης ἀπεπαύσατο λυγρῆς,
<call. hymns. 4.206> ἕζετο δ' ̓Ινωποῖο παρὰ ρῥόον, ὅντε βάθιστον
<call. hymns. 4.207> γαῖα τότ' ἐξανίησιν, ὅτε πλήθοντι ῥεέθρωι
<call. hymns. 4.208> Νεῖλος ἀπὸ κρημνοῖο κατέρχεται Αἰθιοπῆος:
<call. hymns. 4.209> λύσατο δὲ ζώνην, ἀπὸ δ' ἐκλίθη ἔμπαλιν ὤμοις
<call. hymns. 4.210> φοίνικος ποτὶ πρέμνον ἀμηχανίης ὑπὸ λυγρῆς
<call. hymns. 4.211> τειρομένη: νότιος δὲ διὰ χροὸς ἔρρεεν ἱδρώς.
<call. hymns. 4.212> εἶπε δ' ἀλυσθμαίνουσα 'τί μητέρα κοῦρε βαρύνεις;
<call. hymns. 4.213> αὕτη τοι φίλε νῆσος ἐπιπλώουσα θαλάσσηι.
<call. hymns. 4.214> γείνεο, γείνεο κοῦρε καὶ ἤπιος ἔξιθι κόλπου'.
<call. hymns. 4.215> νύμφα Διὸς βαρύθυμε, σὺ δ' οὐκ ἄρ' ἔμελλες ἄπυστος
<call. hymns. 4.216> δὴν ἔμεναι: τοίη σε προσέδραμεν ἀγγελιῶτις,
<call. hymns. 4.217> εἶπε δ' ἔτ' ἀσθμαίνουσα, φόβωι δ' ἀνεμίσγετο μῦθος,
<call. hymns. 4.218> '̔́Ηρη τιμηέσσα, πολὺ προὔχουσα θεάων
<call. hymns. 4.219> σὴ μὲν ἐγώ, σὰ δὲ πάντα, σὺ δὲ κρείουσα κάθησαι
<call. hymns. 4.220> γνησίη Οὐλύμποιο, καὶ οὐ χέρα δείδιμεν ἄλλην
<call. hymns. 4.221> θηλυτέρην, σὺ δ' ἄνασσα τὸν αἴτιον εἴσεαι ὀργῆς.
<call. hymns. 4.222> Λητώ τοι μίτρην ἀναλύεται ἔνδοθι νήσου.
<call. hymns. 4.223> ἄλλαι μὲν πᾶσαί μιν ἀπέστυγον οὐδ' ἐδέχοντο:
<call. hymns. 4.224> ̓Αστερίη δ' ὀνομαστὶ παρερχομένην ἐκάλεσσεν,
<call. hymns. 4.225> ̓Αστερίη, πόντοιο κακὸν σάρον: οἶσθα καὶ αὐτή.
<call. hymns. 4.226> ἀλλὰ φίλη, δύνασαι γάρ, ἀμύνειν πότνια δούλοις
<call. hymns. 4.227> ὑμετέροις, οἳ σεῖο πέδον πατέουσιν ἐφετμῆι'.
<call. hymns. 4.228> ἦ καὶ ὑπὸ χρύσειον ἐδέθλιον ἷζε κύων ὥς,
<call. hymns. 4.229> ̓Αρτέμιδος ἥτις τε, θοῆς ὅτε παύσεται ἄγρης,
<call. hymns. 4.230> ἵζει θηρήτειρα παρ' ἴχνεσιν, οὔατα δ' αὐτῆς
<call. hymns. 4.231> ὀρθὰ μάλ', αἰὲν ἑτοῖμα θεῆς ὑποδέχθαι ὀμοκλήν:
<call. hymns. 4.232> τῆι ἰκέλη Θαύμαντος ὑπὸ θρόνον ἵζετο κούρη.
<call. hymns. 4.233> κείνη δ' οὐδέποτε σφετέρης ἐπιλήθεται ἕδρης,
<call. hymns. 4.234> οὐδ' ὅτε οἱ ληθαῖον ἐπὶ πτερὸν ὕπνος ἐρείσει,
<call. hymns. 4.235> ἀλλ' αὐτοῦ μεγάλοιο ποτὶ γλωχῖνα θρόνοιο
<call. hymns. 4.236> τυτθὸν ἀποκλίνασα καρήατα λέχριος εὕδει.
<call. hymns. 4.237> οὐδέ ποτε ζώνην ἀναλύεται οὐδὲ ταχείας
<call. hymns. 4.238> ἐνδρομίδας, μή οἵ τι καὶ αἰφνίδιον ἔπος εἴπηι
<call. hymns. 4.239> δεσπότις. ἣ δ' ἀλεγεινὸν ἀλαστήσασα προσηύδα
<call. hymns. 4.240> 'οὕτω νῦν, ὦ Ζηνὸς ὀνείδεα, καὶ γαμέοισθε
<call. hymns. 4.241> λάθρια καὶ τίκτοιτε κεκρυμμένα, μηδ' ὅθι δειλαί
<call. hymns. 4.242> δυστοκέες μογέουσιν ἀλετρίδες, ἀλλ' ὅθι φῶκαι
<call. hymns. 4.243> εἰνάλιαι τίκτουσιν, ἐνὶ σπιλάδεσσιν ἐρήμοις.
<call. hymns. 4.244> ̓Αστερίηι δ' οὐδέν τι βαρύνομαι εἵνεκα τῆσδε
<call. hymns. 4.245> ἀμπλακίης, οὐδ' ἔστιν ὅπως ἀποθύμια ῥέξω:
<call. hymns. 4.246> τόσσα δέω: μάλα γάρ τε κακῶς ἐχαρίσσατο Λητοῖ:
<call. hymns. 4.247> ἀλλά μιν ἔκπαγλόν τι σεβίζομαι, οὕνεκ' ἐμεῖο
<call. hymns. 4.248> δέμνιον οὐκ ἐπάτησε, Διὸς δ' ἀνθείλετο πόντον'.
<call. hymns. 4.249> ἣ μὲν ἔφη: κύκνοι δὲ θεοῦ μέλποντες ἄοζοι
<call. hymns. 4.250> Μηιόνιον Πακτωλὸν ἐκυκλώσαντο λιπόντες
<call. hymns. 4.251> ἑβδομάκις περὶ Δῆλον, ἐπήεισαν δὲ λοχείηι
<call. hymns. 4.252> Μουσάων ὄρνιθες, ἀοιδότατοι πετεηνῶν:
<call. hymns. 4.253> ἔνθεν ὁ παῖς τοσσάσδε λύρηι ἐνεδήσατο χορδάς
<call. hymns. 4.254> ὕστερον, ὁσσάκι κύκνοι ἐπ' ὠδίνεσσιν ἄεισαν.
<call. hymns. 4.255> ὄγδοον οὐκέτ' ἄεισαν, ὃ δ' ἔκθορεν, αἳ δ' ἐπὶ μακρὸν
<call. hymns. 4.256> νύμφαι Δηλιάδες, ποταμοῦ γένος ἀρχαίοιο,
<call. hymns. 4.257> εἶπαν ̓Ελειθυίης ἱερὸν μέλος, αὐτίκα δ' αἰθήρ
<call. hymns. 4.258> χάλκεος ἀντήχησε διαπρυσίην ὀλολυγήν,
<call. hymns. 4.259> οὐδ' ̔́Ηρη νεμέσησεν, ἐπεὶ χόλον ἐξέλετο Ζεύς.
<call. hymns. 4.260> χρύσεά τοι τότε πάντα θεμείλια γείνετο Δῆλε,
<call. hymns. 4.261> χρυσῶι δὲ τροχόεσσα πανήμερος ἔρρεε λίμνη,
<call. hymns. 4.262> χρύσειον δ' ἐκόμησε γενέθλιον ἔρνος ἐλαίης,
<call. hymns. 4.263> χρυσῶι δὲ πλήμυρε βαθὺς ̓Ινωπὸς ἑλιχθείς.
<call. hymns. 4.264> αὐτὴ δὲ χρυσέοιο ἀπ' οὔδεος εἵλεο παῖδα,
<call. hymns. 4.265> ἐν δ' ἐβάλευ κόλποισιν, ἔπος δ' ἐφθέγξαο τοῖον
<call. hymns. 4.266> “ὦ μεγάλη πολύβωμε πολύπτολι πολλὰ φέρουσα,
<call. hymns. 4.267> πίονες ἤπειροί τε καὶ αἳ περιναίετε νῆσοι:
<call. hymns. 4.268> αὕτη ἐγὼ τοιήδε: δυσήροτος, ἀλλ' ἀπ' ἐμεῖο
<call. hymns. 4.269> Δήλιος ̓Απόλλων κεκλήσεται, οὐδέ τις ἄλλη
<call. hymns. 4.270> γαιάων τοσσόνδε θεῶι πεφιλήσεται ἄλλωι,
<call. hymns. 4.271> οὐ Κερχνὶς κρείοντι Ποσειδάωνι Λεχαίου,
<call. hymns. 4.272> οὐ πάγος ̔Ερμείηι Κυλλήνιος, οὐ Διὶ Κρήτη,
<call. hymns. 4.273> ὡς ἐγὼ ̓Απόλλωνι: καὶ ἔσσομαι οὐκέτι πλαγκτή.”
<call. hymns. 4.274> ὧδε σὺ μὲν κατέλεξας: ὃ δὲ γλυκὺν ἔσπασε μαζόν.
<call. hymns. 4.275> τῶι καὶ νησάων ἁγιωτάτη ἐξέτι κείνου
<call. hymns. 4.276> κλήζηι, ̓Απόλλωνος κουροτρόφος: οὐδέ ς' ̓Ενυώ
<call. hymns. 4.277> οὐδ' ̓Αίδης οὐδ' ἵπποι ἐπιστείβουσιν ̓́Αρηος:
<call. hymns. 4.278> ἀλλά τοι ἀμφιετεῖς δεκατηφόροι αἰὲν ἀπαρχαί
<call. hymns. 4.279> πέμπονται, πᾶσαι δὲ χοροὺς ἀνάγουσι πόληες,
<call. hymns. 4.280> αἵ τε πρὸς ἠοίην αἵ θ' ἕσπερον αἵ τ' ἀνὰ μέσσην
<call. hymns. 4.281> κλήρους ἐστήσαντο, καὶ οἳ καθύπερθε βορείης
<call. hymns. 4.282> οἰκία θινὸς ἔχουσι, πολυχρονιώτατον αἷμα.
<call. hymns. 4.283> οἳ μέν τοι καλάμην τε καὶ ἱερὰ δράγματα πρῶτοι
<call. hymns. 4.284> ἀσταχύων φορέουσιν: ἃ Δωδώνηθι Πελασγοί
<call. hymns. 4.285> τηλόθεν ἐκβαίνοντα πολὺ πρώτιστα δέχονται,
<call. hymns. 4.286> γηλεχέες θεράποντες ἀσιγήτοιο λέβητος:
<call. hymns. 4.287> δεύτερον ̔Ιερὸν ἄστυ καὶ οὔρεα Μηλίδος αἴης
<call. hymns. 4.288> ἔρχονται: κεῖθεν δὲ διαπλώουσιν ̓Αβάντων
<call. hymns. 4.289> εἰς ἀγαθὸν πεδίον Ληλάντιον: οὐδ' ἔτι μακρός
<call. hymns. 4.290> ὁ πλόος Εὐβοίηθεν, ἐπεὶ σέο γείτονες ὅρμοι.
<call. hymns. 4.291> πρῶταί τοι τάδ' ἔνεικαν ἀπὸ ξανθῶν ̓Αριμασπῶν
<call. hymns. 4.292> Οὖπίς τε Λοξώ τε καὶ εὐαίων ̔Εκαέργη,
<call. hymns. 4.293> θυγατέρες Βορέαο, καὶ ἄρσενες οἳ τότ' ἄριστοι
<call. hymns. 4.294> ἠιθέων: οὐδ' οἵ γε παλιμπετὲς οἴκαδ' ἵκοντο,
<call. hymns. 4.295> εὔμοιροι δ' ἐγένοντο, καὶ ἀκλέες οὔποτ' ἐκεῖνοι.
<call. hymns. 4.296> ἦ τοι Δηλιάδες μέν, ὅτ' εὐήχης ὑμέναιος
<call. hymns. 4.297> ἤθεα κουράων μορμύσσεται, ἥλικα χαίτην
<call. hymns. 4.298> παρθενικαῖς, παῖδες δὲ θέρος τὸ πρῶτον ἰούλων
<call. hymns. 4.299> ἄρσενες ἠιθέοισιν ἀπαρχόμενοι φορέουσιν.
<call. hymns. 4.300> ̓Αστερίη θυόεσσα, σὲ μὲν περί τ' ἀμφί τε νῆσοι
<call. hymns. 4.301> κύκλον ἐποιήσαντο καὶ ὡς χορὸν ἀμφεβάλοντο:
<call. hymns. 4.302> οὔτε σιωπηλὴν οὔτ' ἄψοφον οὖλος ἐθείραις
<call. hymns. 4.303> ἕσπερος, ἀλλ' αἰεί σε καταβλέπει ἀμφιβόητον.
<call. hymns. 4.304> οἳ μὲν ὑπαείδουσι νόμον Λυκίοιο γέροντος,
<call. hymns. 4.305> ὅν τοι ἀπὸ Ξάνθοιο θεοπρόπος ἤγαγεν ̓Ωλήν:
<call. hymns. 4.306> αἳ δὲ ποδὶ πλήσσουσι χορίτιδες ἀσφαλὲς οὖδας.
<call. hymns. 4.307> δὴ τότε καὶ στεφάνοισι βαρύνεται ἱρὸν ἄγαλμα
<call. hymns. 4.308> Κύπριδος ἀρχαίης ἀριήκοον, ἥν ποτε Θησεύς
<call. hymns. 4.309> εἵσατο σὺν παίδεσσιν, ὅτε Κρήτηθεν ἀνέπλει.
<call. hymns. 4.310> οἳ χαλεπὸν μύκημα καὶ ἄγριον υἷα φυγόντες
<call. hymns. 4.311> Πασιφάης καὶ γναμπτὸν ἕδος σκολιοῦ λαβυρίνθου
<call. hymns. 4.312> πότνια σὸν περὶ βωμὸν ἐγειρομένου κιθαρισμοῦ
<call. hymns. 4.313> κύκλιον ὠρχήσαντο, χοροῦ δ' ἡγήσατο Θησεύς.
<call. hymns. 4.314> ἔνθεν ἀειζώοντα θεωρίδος ἱερὰ Φοίβωι
<call. hymns. 4.315> Κεκροπίδαι πέμπουσι, τοπήια νηὸς ἐκείνης.
<call. hymns. 4.316> ̓Αστερίη πολύβωμε πολύλλιτε, τίς δέ σε ναύτης
<call. hymns. 4.317> ἔμπορος Αἰγαίοιο παρήλυθε νηὶ θεούσηι;
<call. hymns. 4.318> οὐχ ούτω μεγάλοι μιν ἐπιπνείουσιν ἀῆται,
<call. hymns. 4.319> χρειὼ δ' ὅττι τάχιστον ἄγει πλόον, ἀλλὰ τὰ λαίφη
<call. hymns. 4.320> ὠκέες ἐστείλαντο καὶ οὐ πάλιν αὖτις ἔβησαν,
<call. hymns. 4.321> πρὶν μεγάλη σέο βωμὸν ὑπὸ πληγῆισιν ἑλίξαι
<call. hymns. 4.322> ῥησσόμενον καὶ πρέμνον ὀδακτάσαι ἁγνὸν ἐλαίης
<call. hymns. 4.323> χεῖρας ἀποστρέψαντας: ἃ Δηλιὰς εὕρετο νύμφη
<call. hymns. 4.324> παίγνια κουρίζοντι καὶ ̓Απόλλωνι γελαστύν.
<call. hymns. 4.325> ἱστίη ὦ νήσων εὐέστιε χαῖρε μὲν αὐτή,
<call. hymns. 4.326> χαίροι δ' ̓Απόλλων τε καὶ ἣν ἐλοχεύσαο Λητώ.
<call. hymns. 5.1> ́Οσσαι λωτροχόοι τᾶς Παλλάδος ἔξιτε πᾶσαι,
<call. hymns. 5.2> ἔξιτε: τᾶν ἵππων ἄρτι φρυασσομενᾶν
<call. hymns. 5.3> τᾶν ἱερᾶν ἐσάκουσα, καὶ ἁ θεὸς εὔτυκος ἕρπειν:
<call. hymns. 5.4> σοῦσθέ νυν, ὦ ξανθαί σοῦσθε Πελασγιάδες.
<call. hymns. 5.5> οὔποκ' ̓Αθαναία μεγάλως ἀπενίψατο πάχεις
<call. hymns. 5.6> πρὶν κόνιν ἱππειᾶν ἐξελάσαι λαγόνων,
<call. hymns. 5.7> οὐδ' ὅκα δὴ λύθρωι πεπαλαγμένα πάντα φέροισα
<call. hymns. 5.8> τεύχεα τῶν ἀδίκων ἦνθ' ἀπὸ γηγενέων,
<call. hymns. 5.9> ἀλλὰ πολὺ πράτιστον ὑφ' ἅρματος αὐχένας ἵππων
<call. hymns. 5.10> λυσαμένα παγαῖς ἔκλυσεν ̓Ωκεανῶ
<call. hymns. 5.11> ἱδρῶ καὶ ῥαθάμιγγας, ἐφοίβασεν δὲ παγέντα
<call. hymns. 5.12> πάντα χαλινοφάγων ἀφρὸν ἀπὸ στομάτων.
<call. hymns. 5.13> ὦ ἴτ' ̓Αχαιιάδες, καὶ μὴ μύρα μηδ' ἀλαβάστρως
<call. hymns. 5.14> （συρίγγων ἀίω φθόγγον ὑπαξονίων）,
<call. hymns. 5.15> μὴ μύρα λωτροχόοι τᾶι Παλλάδι μηδ' ἀλαβάστρως
<call. hymns. 5.16> （οὐ γὰρ ̓Αθαναία χρίματα μεικτὰ φιλεῖ）
<call. hymns. 5.17> οἴσετε μηδὲ κάτοπτρον: ἀεὶ καλὸν ὄμμα τὸ τήνας
<call. hymns. 5.18> οὐδ' ὅκα τὰν ̓́Ιδαι Φρὺξ ἐδίκαζεν ἔριν,
<call. hymns. 5.19> οὔτ' ἐς ὀρείχαλκον μεγάλα θεὸς οὔτε Σιμοῦντος
<call. hymns. 5.20> ἔβλεψεν δίναν ἐς διαφαινομέναν:
<call. hymns. 5.21> οὐδ' ́Ηρα: Κύπρις δὲ διαυγέα χαλκὸν ἑλοῖσα
<call. hymns. 5.22> πολλάκι τὰν αὐτὰν δὶς μετέθηκε κόμαν:
<call. hymns. 5.23> ἃ δέ, δὶς ἑξήκοντα διαθρέξασα διαύλως,
<call. hymns. 5.24> οἷα παρ' Εὐρώται τοὶ Λακεδαιμόνιοι
<call. hymns. 5.25> ἀστέρες, ἐμπεράμως ἐνετρίψατο λιτὰ βαλοῖσα
<call. hymns. 5.26> χρίματα, τᾶς ἰδίας ἔκγονα φυταλιᾶς:
<call. hymns. 5.27> ὦ κῶραι, τὸ δ' ἔρευθος ἀνέδραμε, πρώιον οἵαν
<call. hymns. 5.28> ἢ ῥόδον ἢ σίβδας κόκκος ἔχει χροΐαν.
<call. hymns. 5.29> τῶι καὶ νῦν ἄρσεν τι κομίξατε μῶνον ἔλαιον,
<call. hymns. 5.30> ὧι Κάστωρ, ὧι καὶ χρίεται ̔Ηρακλέης:
<call. hymns. 5.31> οἴσετε καὶ κτένα οἱ παγχρύσεον, ὡς ἀπὸ χαίταν
<call. hymns. 5.32> πέξηται, λιπαρὸν σμασαμένα πλόκαμον.
<call. hymns. 5.33> ἔξιθ' ̓Αθαναία: πάρα τοι καταθύμιος ἴλα,
<call. hymns. 5.34> παρθενικαὶ μεγάλων παῖδες ̓Αρεστοριδᾶν:
<call. hymns. 5.35> ὠθάνα, φέρεται δὲ καὶ ἁ Διομήδεος ἀσπίς,
<call. hymns. 5.36> ὡς ἔθος ̓Αργείων τοῦτο παλαιότερον:
<call. hymns. 5.38> Εὐμήδης ἐδίδαξε, τεὶν κεχαρισμένος ἱρεύς:
<call. hymns. 5.39> ὅς ποκα βωλευτὸν γνοὺς ἐπί οἱ θάνατον
<call. hymns. 5.40> δᾶμον ἑτοιμάζοντα φυγᾶι τεὸν ἱρὸν ἄγαλμα
<call. hymns. 5.40> ὤιχετ' ἔχων, Κρεῖον δ' εἰς ὄρος ὠικίσατο:
<call. hymns. 5.41> κρεῖον ὄρος: σὲ δὲ δαῖμον ἀπορρώγεσσιν ἔθηκεν
<call. hymns. 5.42> ἐν πέτραις, αἷς νῦν οὔνομα Παλλατίδες.
<call. hymns. 5.43> ἔξιθ' ̓Αθαναία περσέπτολι χρυσεοπήληξ,
<call. hymns. 5.44> ἵππων καὶ σακέων ἁδομένα πατάγωι.
<call. hymns. 5.45> σάμερον ὑδροφόροι μὴ βάπτετε — σάμερον ̓́Αργος
<call. hymns. 5.46> πίνετ' ἀπὸ κρανᾶν μηδ' ἀπὸ τῶ ποταμῶ,
<call. hymns. 5.47> σάμερον αἱ δῶλαι τὰς κάλπιδας ἢ 'ς Φυσάδειαν
<call. hymns. 5.48> ἢ ἐς ̓Αμυμώναν οἴσετε τὰν Δαναῶ.
<call. hymns. 5.49> καὶ γὰρ δὴ χρυσῶι τε καὶ ἄνθεσιν ὕδατα μείξας
<call. hymns. 5.50> ἡξεῖ φορβαίων ̓́Ιναχος ἐξ ὀρέων
<call. hymns. 5.51> τἀθάναι τὸ λοετρὸν ἄγων καλόν. ἀλλὰ Πελασγέ
<call. hymns. 5.52> φράζεο μὴ οὐκ ἐθέλων τὰν βασίλειαν ἴδηις.
<call. hymns. 5.53> ὅς κεν ἴδηι γυμνὰν τὰν Παλλάδα τὰν πολιοῦχον,
<call. hymns. 5.54> τὦργος ἐσοψεῖται τοῦτο πανυστάτιον.
<call. hymns. 5.55> πότνι' ̓Αθαναία τὺ μὲν ἔξιθι: μέσφα δ' ἐγώ τι
<call. hymns. 5.56> ταῖσδ' ἐρέω. μῦθος δ' οὐκ ἐμός, ἀλλ' ἑτέρων.
<call. hymns. 5.57> παῖδες, ̓Αθαναία νύμφαν μίαν ἔν ποκα Θήβαις
<call. hymns. 5.58> πουλύ τι καὶ πέρι δὴ φίλατο τᾶν ἑταρᾶν,
<call. hymns. 5.59> ματέρα Τειρεσίαο, καὶ οὔποκα χωρὶς ἔγεντο:
<call. hymns. 5.60> ἀλλὰ καὶ ἀρχαίων εὖτ' ἐπὶ Θεσπιέων
<call. hymns. 5.61> ¯˘˘¯˘˘¯˘ ἢ εἰς ̔Αλίαρτον ἐλαύνοι
<call. hymns. 5.62> ἵππως, Βοιωτῶν ἔργα διερχομένα,
<call. hymns. 5.63> ἢ' πὶ Κορωνείας, ἵνα οἱ τεθυωμένον ἄλσος
<call. hymns. 5.64> καὶ βωμοὶ ποταμῶι κεῖντ' ἐπὶ Κουραλίωι:
<call. hymns. 5.65> πολλάκις ἁ δαίμων νιν ἑῶ ἐπεβάσατο δίφρω,
<call. hymns. 5.66> οὐδ' ὄαροι νυμφᾶν οὐδὲ χοροστασίαι
<call. hymns. 5.67> ἁδεῖαι τελέθεσκον, ὅκ' οὐχ ἁγεῖτο Χαρικλώ:
<call. hymns. 5.68> ἀλλ' ἔτι καὶ τήναν δάκρυα πόλλ' ἔμενεν,
<call. hymns. 5.69> καίπερ ̓Αθαναίαι καταθύμιον ἔσσαν ἑταίραν.
<call. hymns. 5.70> δή ποκα γὰρ πέπλων λυσομένα περόνας
<call. hymns. 5.71> ἵππω ἐπὶ κράναι ̔Ελικωνίδι καλὰ ῥεοίσαι
<call. hymns. 5.72> λῶντο: μεσαμβρινὰ δ' εἶχ' ὄρος ἁσυχία.
<call. hymns. 5.73> ἀμφότεραι λώοντο, μεσαμβριναὶ δ' ἔσαν ὧραι,
<call. hymns. 5.74> πολλὰ δ' ἁσυχία τῆνο κατεῖχεν ὄρος.
<call. hymns. 5.75> Τειρεσίας δ' ἔτι μῶνος ἁμᾶ κυσὶν ἄρτι γένεια
<call. hymns. 5.76> περκάζων ἱερὸν χῶρον ἀνεστρέφετο:
<call. hymns. 5.77> διψάσας δ' ἄφατόν τι ποτὶ ρῥόον ἤλυθε κράνας,
<call. hymns. 5.78> σχέτλιος: οὐκ ἐθέλων δ' εἶδε τὰ μὴ θεμιτά:
<call. hymns. 5.79> τὸν δὲ χολωσαμένα περ ὅμως προσέφασεν ̓Αθάνα
<call. hymns. 5.80> 'τίς σε, τὸν ὀφθαλμὼς οὐκέτ' ἀποισόμενον,
<call. hymns. 5.81> ὦ Εὐηρείδα, χαλεπὰν ὁδὸν ἄγαγε δαίμων;'
<call. hymns. 5.82> ἃ μὲν ἔφα, παιδὸς δ' ὄμματα νὺξ ἔλαβεν.
<call. hymns. 5.83> ἑστάκη δ' ἄφθογγος, ἐκόλλασαν γὰρ ἀνῖαι
<call. hymns. 5.84> γώνατα καὶ φωνὰν ἔσχεν ἀμηχανία.
<call. hymns. 5.85> ἁ νύμφα δ' ἐβόασε 'τί μοι τὸν κῶρον ἔρεξας
<call. hymns. 5.86> πότνια; τοιαῦται δαίμονες ἐστἐ φίλαι;
<call. hymns. 5.87> ὄμματά μοι τῶ παιδὸς ἀφείλεο. τέκνον ἄλαστε
<call. hymns. 5.88> εἶδες ̓Αθαναίας στήθεα καὶ λαγόνας,
<call. hymns. 5.89> ἀλλ' οὐκ ἀέλιον πάλιν ὄψεαι. ὦ ἐμὲ δειλάν,
<call. hymns. 5.90> ὦ ὄρος, ὦ ̔Ελικὼν οὐκέτι μοι παριτέ,
<call. hymns. 5.91> ἦ μεγάλ' ἀντ' ὀλίγων ἐπράξαο: δόρκας ὀλέσσας
<call. hymns. 5.92> καὶ πρόκας οὐ πολλὰς φάεα παιδὸς ἔχεις.'
<call. hymns. 5.93> † ἁ μὲν ἀμφοτέραισι φίλον περὶ παῖδα λαβοῖσα
<call. hymns. 5.94> † μάτηρ μὲν γοερᾶν οἶτον ἀηδονίδων
<call. hymns. 5.95> ἆγε βαρὺ κλαίοισα, θεὰ δ' ἐλέησεν ἑταίραν
<call. hymns. 5.96> καί νιν ̓Αθαναία πρὸς τόδ' ἔλεξεν ἔπος
<call. hymns. 5.97> 'δῖα γύναι μετὰ πάντα βαλεῦ πάλιν ὅσσα δι' ὀργάν
<call. hymns. 5.98> εἶπας: ἐγὼ δ' οὔ τοι τέκνον ἔθηκ' ἀλαόν.
<call. hymns. 5.99> οὐ γὰρ ̓Αθαναίαι γλυκερὸν πέλει ὄμματα παίδων
<call. hymns. 5.100> ἁρπάζειν: Κρόνιοι δ' ὧδε λέγοντι νόμοι:
<call. hymns. 5.101> ὅς κε τιν' ἀθανάτων, ὅκα μὴ θεὸς αὐτὸς ἕληται,
<call. hymns. 5.102> ἀθρήσηι, μισθῶ τοῦτον ἰδεῖν μεγάλω.
<call. hymns. 5.103> δῖα γύναι, τὸ μὲν οὐ παλινάγρετον αὖθι γένοιτο
<call. hymns. 5.104> ἔργον: ἐπεὶ μοιρᾶν ὧδ' ἐπένησε λίνα,
<call. hymns. 5.105> ἁνίκα τὸ πρᾶτόν νιν ἐγείναο: νῦν δὲ κομίζευ,
<call. hymns. 5.106> ὦ Εὐηρείδα, τέλθος ὀφειλόμενον.
<call. hymns. 5.107> πόσσα μὲν ἁ Καδμηὶς ἐς ὕστερον ἔμπυρα καυσεῖ,
<call. hymns. 5.108> πόσσα δ' ̓Αρισταῖος, τὸν μόνον εὐχόμενοι
<call. hymns. 5.109> παῖδα, τὸν ἁβατὰν ̓Ακταίονα, τυφλὸν ἰδέσθαι.
<call. hymns. 5.110> καὶ τῆνος μεγάλας σύνδρομος ̓Ατέμιδος
<call. hymns. 5.111> ἐσσεῖτ': ἀλλ' οὐκ αὐτὸν ὅ τε δρόμος αἵ τ' ἐν ὄρεσσι
<call. hymns. 5.112> ῥυσεῦνται ξυναὶ τᾶμος ἑκαβολίαι,
<call. hymns. 5.113> ὁπ πόκα κοὐκ ἐθέλων περ ἴδηι χαρίεντα λοετρά
<call. hymns. 5.115> δαίμονος: ἀλλ' αὐταὶ τὸν πρὶν ἄνακτα κύνες
<call. hymns. 5.116> τουτάκι δειπνησεῦντι: τὰ δ' υἱέος ὀστέα μάτηρ
<call. hymns. 5.117> λεξεῖται δρυμὼς πάντας ἐπερχομένα:
<call. hymns. 5.118> ὀλβίσταν ἐρέει σε καὶ εὐαίωνα γενέσθαι,
<call. hymns. 5.119> ἐξ ὀρέων ἀλαὸν παῖδ' ἀποδεξαμέναν.
<call. hymns. 5.120> ὦ ἑτάρα, τῶι μή τι μινύρεο: τῶιδε γὰρ ἄλλα
<call. hymns. 5.120> τεῦ χάριν ἐξ ἐμέθεν πολλὰ μενεῦντι γέρα.
<call. hymns. 5.121> μάντιν ἐπεὶ θησῶ νιν ἀοίδιμον ἐσσομένοισιν,
<call. hymns. 5.122> ἦ μέγα τῶν ἄλλων δή τι περισσότερον,
<call. hymns. 5.123> γνωσεῖται δ' ὄρνιχας, ὃς αἴσιος οἵ τε πέτονται
<call. hymns. 5.124> ἤλιθα καὶ ποίων οὐκ ἀγαθαὶ πτέρυγες.
<call. hymns. 5.125> πολλὰ δὲ Βοιωτοῖσι θεοπρόπα, πολλὰ δὲ Κάδμωι
<call. hymns. 5.126> χρησεῖ, καὶ μεγάλοις ὕστερα Λαβδακίδαις.
<call. hymns. 5.127> δωσῶ καὶ μέγα βάκτρον, ὅ οἱ πόδας ἐς δέον ἀξεῖ,
<call. hymns. 5.128> δωσῶ καὶ βιότω τέρμα πολυχρόνιον.
<call. hymns. 5.129> καὶ μόνος, εὖτε θάνηι, πεπνυμένος ἐν νεκύεσσι
<call. hymns. 5.130> φοιτασεῖ, μεγάλωι τίμιος ̔Αγεσίλαι.
<call. hymns. 5.131> ὣς φαμένα κατένευσε: τὸ δ' ἐντελές ὧι κ' ἔπι νεύσηι
<call. hymns. 5.132> Παλλάς, ἐπεὶ μώναι Ζεὺς τό γε θυγατέρων
<call. hymns. 5.133> δῶκεν ̓Αθαναίαι, πατρώια πάντα φέρεσθαι,
<call. hymns. 5.134> λωτροχόοι, μάτηρ δ' οὔτις ἔτικτε θεάν,
<call. hymns. 5.135> ἀλλὰ Διὸς κορυφά. κορυφὰ Διὸς οὐκ ἐπινεύει
<call. hymns. 5.136> ψεύδεα αι θυγάτηρ.
<call. hymns. 5.137> ἔρχετ' ̓Αθαναία νῦν ἀτρεκές: ἀλλὰ δέχεσθε
<call. hymns. 5.138> τὰν θεόν, ὦ κῶραι, τὦργον ὅσαις μέλεται,
<call. hymns. 5.139> σύν τ' εὐαγορίαι σύν τ' εὔγμασι σύν τ' ὀλολυγαῖς.
<call. hymns. 5.140> χαῖρε θεά, κάδευ δ' ̓́Αργεος ̓Ιναχίω.
<call. hymns. 5.141> χαῖρε καὶ ἐξελάοισα, καὶ ἐς πάλιν αὖτις ἐλάσσαις
<call. hymns. 5.142> ἵππως, καὶ Δαναῶν κλᾶρον ἅπαντα σάω.
<call. hymns. 6.1> τῶ καλάθω κατιόντος ἐπιφθέγξασθε γυναῖκες
<call. hymns. 6.2> 'Δάματερ μέγα χαῖρε πολύτροφε πουλυμέδιμνε'.
<call. hymns. 6.3> τὸν κάλαθον κατιόντα χαμαὶ θασεῖσθε βέβαλοι,
<call. hymns. 6.4> μηδ' ἀπὸ τῶ τέγεος μηδ' ὑψόθεν αὐγάσσησθε
<call. hymns. 6.5> μὴ παῖς μηδὲ γυνὰ μηδ' ἃ κατεχεύατο χαίταν,
<call. hymns. 6.6> μηδ' ὅκ' ἀφ' αὑαλέων στομάτων πτύωμες ἄπαστοι.
<call. hymns. 6.7> ἕσπερος ἐκ νεφέων ἐσκέψατο （πανίκα νεῖται;）,
<call. hymns. 6.8> ἕσπερος, ὅστε πιεῖν Δαμάτερα μῶνος ἔπεισεν,
<call. hymns. 6.9> ἁρπαγίμας ὅκ' ἄπυστα μετέστιχεν ἴχνια κώρας.
<call. hymns. 6.10> πότνια πῶς σε δύναντο πόδες φέρεν ἔστ' ἐπὶ δυθμάς,
<call. hymns. 6.11> ἔστ' ἐπὶ τὼς μέλανας καὶ ὅπα τὰ χρύσεα μᾶλα;
<call. hymns. 6.12> οὐ πίες οὐδ' ἄρ' ἔδες τῆνον χρόνον οὐδὲ λοέσσα.
<call. hymns. 6.13> τρὶς μὲν δὴ διέβας ̓Αχελώιον ἀργυροδίναν,
<call. hymns. 6.14> τοσσάκι δ' ἀενάων ποταμῶν ἐπέρασας ἕκαστον,
<call. hymns. 6.15> τρὶς δ' ἐπὶ Καλλιχόρωι χαμάδις ἐκαθίσσαο φρητί
<call. hymns. 6.16> αὐσταλέα ἄποτός τε καὶ οὐ φάγες οὐδὲ λοέσσα.
<call. hymns. 6.17> μὴ μὴ ταῦτα λέγωμες ἃ δάκρυον ἄγαγε Δηοῖ:
<call. hymns. 6.18> κάλλιον, ὡς πολίεσσιν ἑαδότα τέθμια δῶκε:
<call. hymns. 6.19> κάλλιον, ὡς καλάμαν τε καὶ ἱερὰ δράγματα πράτα
<call. hymns. 6.20> ἀσταχύων ἀπέκοψε καὶ ἐν βόας ἧκε πατῆσαι,
<call. hymns. 6.21> ἁνίκα Τριπτόλεμος ἀγαθὰν ἐδιδάσκετο τέχναν:
<call. hymns. 6.22> κάλλιον, ὡς （ἵνα καί τις ὑπερβασίας ἀλέηται）
<call. hymns. 6.23> π ἰδέσθαι
<call. hymns. 6.24> οὔπω τὰν Κνιδίαν, ἔτι Δώτιον ἱρὸν ἔναιον,
<call. hymns. 6.25> τεῖ δ' αὐτᾶι καλὸν ἄλσος ἐποιήσαντο Πελασγοί
<call. hymns. 6.26> δένδρεσιν ἀμφιλαφές: διά κεν μόλις ἦνθεν ὀιστός:
<call. hymns. 6.27> ἐν πίτυς, ἐν μεγάλαι πτελέαι ἔσαν, ἐν δὲ καὶ ὄχναι,
<call. hymns. 6.28> ἐν δὲ καλὰ γλυκύμαλα: τὸ δ' ὥστ' ἀλέκτρινον ὕδωρ
<call. hymns. 6.29> ἐξ ἀμαρᾶν ἀνέθυε. θεὰ δ' ἐπεμαίνετο χώρωι
<call. hymns. 6.30> ὅσσον ̓Ελευσῖνι, Τριόπαι θ' ὅσον ὁκκόσον ̓́Ενναι.
<call. hymns. 6.31> ἀλλ' ὅκα Τριοπίδαισιν ὁ δεξιὸς ἄχθετο δαίμων,
<call. hymns. 6.32> τουτάκις ἁ χείρων ̓Ερυσίχθονος ἅψατο βωλά:
<call. hymns. 6.33> σεύατ' ἔχων θεράποντας ἐείκοσι, πάντας ἐν ἀκμᾶι,
<call. hymns. 6.34> πάντας δ' ἀνδρογίγαντας ὅλαν πόλιν ἀρκίος ἆραι,
<call. hymns. 6.35> ἀμφότερον πελέκεσσι καὶ ἀξίναισιν ὁπλίσσας
<call. hymns. 6.36> ἐς δὲ τὸ τᾶς Δάματρος ἀναιδέες ἔδραμον ἄλσος.
<call. hymns. 6.37> ἦς δέ τις αἴγειρος, μέγα δένδρεον αἰθέρι κῦρον,
<call. hymns. 6.38> τῶι ἔπι ταὶ νύμφαι ποτὶ τὤνδιον ἑψιόωντο,
<call. hymns. 6.39> ἃ πράτα πλαγεῖσα κακὸν μέλος ἴαχεν ἄλλαις.
<call. hymns. 6.40> ἄισθετο Δαμάτηρ ὅτι οἱ ξύλον ἱερὸν ἄλγει,
<call. hymns. 6.41> εἶπε δὲ χωσαμένα 'τίς μοι καλὰ δένδρεα κόπτει;'
<call. hymns. 6.42> αὐτίκα Νικίππαι, τὰν οἱ πόλις ἀράτειραν
<call. hymns. 6.43> δαμοσίαν ἔστασαν, ἐείσατο, γέντο δὲ χειρί
<call. hymns. 6.44> στέμματα καὶ μάκωνα, κατωμαδίαν δ' ἔχε κλαῖδα.
<call. hymns. 6.45> φᾶ δὲ παραψύχοισα κακὸν καὶ ἀναιδέα φῶτα
<call. hymns. 6.46> 'τέκνον, ὅτις τὰ θεοῖσιν ἀνειμένα δένδρεα κόπτεις,
<call. hymns. 6.47> τέκνον ἐλίνυσον, τέκνον πολύθεστε τοκεῦσι,
<call. hymns. 6.48> παύεο καὶ θεράποντας ἀπότρεπε, μή τι χαλεφθῆι
<call. hymns. 6.49> πότνια Δαμάτηρ, τᾶς ἱερὸν ἐκκεραΐζεις'.
<call. hymns. 6.50> τὰν δ' ἄρ' ὑποβλέψας χαλεπώτερον ἠὲ κυναγὸν
<call. hymns. 6.51> ὤρεσιν ἐν Τμαρίοισιν ὑποβλέπει ἄνδρα λέαινα
<call. hymns. 6.52> ὠμοτόκος, τᾶς φαντὶ πέλειν βλοσυρώτατον ὄμμα,
<call. hymns. 6.53> 'χάζευ' ἔφα 'μή τοι πέλεκυν μέγαν ἐν χροῒ παξῶ.
<call. hymns. 6.54> ταῦτα δ' ἐμὸν θησεῖ στεγανὸν δόμον, ὧι ἔνι δαῖτας
<call. hymns. 6.55> αἰὲν ἐμοῖς ἑτάροισιν ἄδην θυμαρέας ἀξῶ.'
<call. hymns. 6.56> εἷπεν ὁ παῖς, Νέμεσις δὲ κακὰν ἐγράψατο φωνάν.
<call. hymns. 6.57> Δαμάτηρ δ' ἄφατόν τι κοτέσσατο, εἴσατο δ' ἁ θεύς:
<call. hymns. 6.58> ἴθματα μὲν χέρσω, κεφαλὰ δέ οἱ ἅψατ' ̓Ολύμπω.
<call. hymns. 6.59> οἳ μὲν ἄρ' ἡμιθνῆτες, ἐπεὶ τὰν πότνιαν εἶδον,
<call. hymns. 6.60> ἐξαπίνας ἀπόρουσαν ἐνὶ δρυσὶ χαλκὸν ἀφέντες.
<call. hymns. 6.61> ἃ δ' ἄλλως μὲν ἔασεν, ἀναγκαίαι γὰρ ἕποντο
<call. hymns. 6.62> δεσποτικὰν ὑπὸ χεῖρα, βαρὺν δ' ἀπαμείψατ' ἄνακτα
<call. hymns. 6.63> 'ναὶ ναί, τεύχεο δῶμα κύον κύον ὧι ἔνι δαῖτας
<call. hymns. 6.64> ποιησεῖς: θαμιναὶ γὰρ ἐς ὕστερον εἰλαπίναι τοι.'
<call. hymns. 6.65> ἃ μὲν τόσς' εἰποῖς' ̓Ερυσίχθονι τεῦχε πονηρά.
<call. hymns. 6.66> αὐτίκα οἱ χαλεπόν τε καὶ ἄγριον ἔμβαλε λιμόν
<call. hymns. 6.67> αἴθωνα κρατερόν, μεγάλαι δ' ἐστρεύγετο νούσωι.
<call. hymns. 6.68> σχέτλιος, ὅσσα πάσαιτο τόσων ἔχεν ἵμερος αὖτις.
<call. hymns. 6.69> εἴκατι δαῖτα πένοντο, δυώδεκα δ' οἶνον ἄφυσσον:
<call. hymns. 6.70> τόσσα Διώνυσον γὰρ ἃ καὶ Δάματρα χαλέπτει:
<call. hymns. 6.71> † καὶ γὰρ τᾶι Δάματρι συνωργίσθη Διόνυσος.
<call. hymns. 6.72> οὔτε νιν εἰς ἐράνως οὔτε ξυνδείπνια πέμπον
<call. hymns. 6.73> αἰδόμενοι γονέες, προχανὰ δ' εὑρίσκετο πᾶσα.
<call. hymns. 6.74> ἦνθον ̓Ιτωνιάδος νιν ̓Αθαναίας ἐπ' ἄεθλα
<call. hymns. 6.75> ̓Ορμενίδαι καλέοντες: ἀπ' ὦν ἀρνήσατο μάτηρ
<call. hymns. 6.76> 'οὐκ ἔνδοι, χθιζὸς γὰρ ἐπὶ Κραννῶνα βέβακε
<call. hymns. 6.77> τέλθος ἀπαιτησῶν ἑκατὸν βόας'. ἦνθε Πολυξώ,
<call. hymns. 6.78> μάτηρ ̓Ακτορίωνος, ἐπεὶ γάμον ἄρτυε παιδί,
<call. hymns. 6.79> ἀμφότερον Τριόπαν τε καὶ υἱέα κικλήσκοισα.
<call. hymns. 6.80> τὰν δὲ γυνὰ βαρύθυμος ἀμείβετο δάκρυ χέοισα
<call. hymns. 6.81> 'νεῖταί τοι Τριόπας, ̓Ερυσίχθονα δ' ἤλασε κάπρος
<call. hymns. 6.82> Πίνδον ἀν' εὐάγκειαν, δ δ' ἐννέα φάεα κεῖται'.
<call. hymns. 6.83> δειλαία φιλότεκνε, τί δ' οὐκ ἐψεύσαο, μᾶτερ;
<call. hymns. 6.84> δαίνυεν εἰλαπίναν τις: 'ἐν ἀλλοτρίοις ̓Ερυσίχθων'.
<call. hymns. 6.85> ἄγετό τις νύμφαν: '̓Ερυσίχθονα δίσκος ἔτυψεν,'
<call. hymns. 6.86> ἢ 'ἔπες' ἐξ ἵππων', ἢ 'ἐν ̓́Οθρυϊ ποίμνι' ἀμιθρεῖ'.
<call. hymns. 6.87> ἐνδόμυχος δἤπειτα πανάμερος εἰλαπιναστάς
<call. hymns. 6.88> ἤσθιε μυρία πάντα: κακὰ δ' ἐξάλλετο γαστήρ
<call. hymns. 6.89> αἰεὶ μᾶλλον ἔδοντι, τὰ δ' ἐς βυθὸν οἷα θαλάσσας
<call. hymns. 6.90> ἀλεμάτως ἀχάριστα κατέρρεεν εἴδατα πάντα.
<call. hymns. 6.91> ὡς δὲ Μίμαντι χιών, ὡς ἀελίωι ἔνι πλαγγών,
<call. hymns. 6.92> καὶ τούτων † ἔτι μεῖζον ἐτάκετο μέσφ' ἐπὶ νευράς:
<call. hymns. 6.93> δειλαίωι ἶνές τε καὶ ὀστέα μῶνον ἔλειφθεν.
<call. hymns. 6.94> κλαῖε μὲν ἁ μάτηρ, βαρὺ δ' ἔστενον αἱ δύ' ἀδελφαί
<call. hymns. 6.95> χὡ μαστὸς τὸν ἔπωνε καὶ αἱ δέκα πολλάκι δῶλαι.
<call. hymns. 6.96> καὶ δ' αὐτὸς Τριόπας πολιαῖς ἐπὶ χεῖρας ἔβαλλε,
<call. hymns. 6.97> τοῖα τὸν οὐκ ἀίοντα Ποσειδάωνα καλιστρέων:
<call. hymns. 6.98> 'ψευδοπάτωρ ἰδὲ τόνδε τεοῦ τρίτον, εἴπερ ἐγὼ μέν
<call. hymns. 6.99> σεῦ τε καὶ Αἰολίδος Κανάκας γένος, αὐτὰρ ἐμεῖο
<call. hymns. 6.100> τοῦτο τὸ δείλαιον γένετο βρέφος: αἴθε γὰρ αὐτόν
<call. hymns. 6.101> βλητὸν ὑπ' ̓Απόλλωνος ἐμαὶ χέρες ἐκτερέιξαν:
<call. hymns. 6.102> νῦν δὲ κακὰ βούβρωστις ἐν ὀφθαλμοῖσι κάθηται.
<call. hymns. 6.103> ἤ οἱ ἀπόστασον χαλεπὰν νόσον ἠέ νιν αὐτός
<call. hymns. 6.104> βόσκε λαβών: ἁμαὶ γὰρ ἀπειρήκαντι τράπεζαι.
<call. hymns. 6.105> χῆραι μὲν μάνδραι, κενεαὶ δέ μοι αὔλιες ἤδη
<call. hymns. 6.106> τετραπόδων, ἤδη γὰρ ἀπαρνήσαντο μάγειροι.'
<call. hymns. 6.107> ἀλλὰ καὶ οὐρῆας μεγαλᾶν ὑπέλυσαν ἁμαξᾶν,
<call. hymns. 6.108> καὶ τὰν βῶν ἔφαγεν, τὰν ̔Εστίαι ἔτρεφε μάτηρ,
<call. hymns. 6.109> καὶ τὸν ἀεθλοφόρον καὶ τὸν πολεμήιον ἵππον,
<call. hymns. 6.110> καὶ τὰν αἴλουρον, τὰν ἔτρεμε θηρία μικκά.
<call. hymns. 6.111> μέσφ' ὅκα μὲν Τριόπαο δόμοις ἔνι χρήματα κεῖτο,
<call. hymns. 6.112> μῶνοι ἄρ' οἰκεῖοι θάλαμοι κακὸν ἠπίσταντο.
<call. hymns. 6.113> ἀλλ' ὅκα τὸν βαθὺν οἶκον ἀνεξήραναν ὀδόντες,
<call. hymns. 6.114> καὶ τόχ' ὁ τῶ βασιλῆος ἐνὶ τριόδοισι καθῆστο
<call. hymns. 6.115> αἰτίζων ἀκόλως τε καὶ ἔκβολα λύματα δαιτός.
<call. hymns. 6.116> Δάματερ, μὴ τῆνος ἐμὶν φίλος, ὅς τοι ἀπεχθής,
<call. hymns. 6.117> εἴη μηδ' ὁμότοιχος: ἐμοὶ κακογείτονες ἐχθροί.
<call. hymns. 6.118> ἄισατε παρθενικαί, καὶ ἐπιφθέγξασθε τεκοῖσαι
<call. hymns. 6.119> ̔Δάματερ μέγα χαῖρε πολύτροφε πουλυμέδιμνε'.
<call. hymns. 6.120> χὠς αἱ τὸν κάλαθον λευκότριχες ἵπποι ἄγοντι
<call. hymns. 6.121> τέσσαρες, ὣς ἁμὶν μεγάλα θεὸς εὐρυάνασσα
<call. hymns. 6.122> λευκὸν ἔαρ, λευκὸν δὲ θέρος καὶ χεῖμα φέροισα
<call. hymns. 6.123> ἡξεῖ καὶ φθινόπωρον, ἔτος δ' εἰς ἄλλο φυλαξεῖ.
<call. hymns. 6.124> ὡς δ' ἀπεδίλωτοι καὶ ἀνάμπυκες ἄστυ πατεῦμες,
<call. hymns. 6.125> ὣς πόδας, ὣς κεφαλὰς παναπηρέας ἕξομες αἰεί.
<call. hymns. 6.126> ὡς δ' αἱ λικνοφόροι χρυσῶ πλέα λίκνα φέροντι,
<call. hymns. 6.127> ὣς ἁμὲς τὸν χρυσὸν ἀφειδέα πασαίμεσθα.
<call. hymns. 6.128> μέσφα τὰ τᾶς πόλιος πρυτανήια τὰς ἀτελέστως,
<call. hymns. 6.129> τὰς δὲ τελεσφορέας ποτὶ τὰν θεὸν ἄχρις ὁμαρτεῖν,
<call. hymns. 6.130> αἵτινες ἑξήκοντα κατώτεραι: αἱ δὲ βαρεῖαι
<call. hymns. 6.131> χἄτις ̓Ελειθυίαι τείνει χέρα χἄτις ἐν ἄλγει,
<call. hymns. 6.132> ὣς ἅλις, ὡς αὐτᾶν ἱκανὸν γόνυ: ταῖσι δὲ Δηώ
<call. hymns. 6.133> δωσεῖ πάντ' ἐπίμεστα καὶ ὡς ποτὶ ναὸν ἵκωνται.
<call. hymns. 6.134> χαῖρε θεὰ καὶ τάνδε σάω πόλιν ἔν θ' ὁμονοίαι
<call. hymns. 6.135> ἔν τ' εὐηπελίαι, φέρε δ' ἀγρόθι νόστιμα πάντα:
<call. hymns. 6.136> φέρβε βόας, φέρε μᾶλα, φέρε στάχυν, οἶσε θερισμόν,
<call. hymns. 6.137> φέρβε καὶ εἰράναν, ἵν' ὃς ἄροσε τῆνος ἀμάσηι.
<call. hymns. 6.138> ἵλαθί μοι τρίλλιστε μέγα κρείοισα θεάων.